O le leai o se laugatogi a le Kolisi a Vaimauga i lenei tausaga na faailoa e le alii pule aoga, Timoti Militini e mafua mai ona o le mau faafitauli o loo feagai ma le aoga sa amata mai lava i nisi o tausaga ua mavae. Faaalia e Militini, o se faaiuga ua autasi uma i ai le aiga faiaoga faapea le komiti ona o mafuaaga ua mae‘a ona faaalia i luma o sa latou fonotaga.
“O le leai o se tupe, o se tasi lea o mafuaaga, ma e aofia ai ma le tau sue o se fale(hall) e faia ai le laugatogi, o totogi o feoaiga mo ia fuafuaga, o tau o faailoga, o le saogalemu o tamaitai ma alii o le aoga ma nisi lava itu ua vaai le kolisi ua lē talafeagai ai se laugatogi mo lenei tausaga,” o se saunoaga lea a le alii puleaoga.
O ni faafitauli na ta‘ua e le Alii Pule ua tele tausaga o vaaia ae na taumafai lava e saili lelei ni nofoaga aemaise o ni togi mo fanau i tausaga ua tea. O le tausaga lenei na faaalia e le alii Pule ua leai lava se isi gaioiga e mafai ona faatino ai le faamoemoe lenei mo le fanau.
“O le ripoti lava le mea tāua, o le molimau lea o le aotelega a le faiaoga e uiga i le tamaitiiti mo le tausaga atoa, ma afai o ā ni faaseā mai mātua, e sili pe a aga‘i sa‘o mai matou te talanoa” o se faamatalaga lea a Militini.
Na saunoa foi, o laugatogi e lē faamalosia le faatautaia e le Matagaluega. E to‘a 345 alii ma tamaitai o loo aoaoina i le Kolisi a Vaimauga ma e silia ma le ‘afa o i latou nei e lei totogia pili aoga o le kuata lenei, o se tasi lea itu na faamanino mai e le pule aoga.
O le taimi nei, ua tuu atu se tusi a le pule aoga i le Ofisa Sili o le Matagaluega o Aoga e faailoa ai lea tulaga.
Na faamautu mai e le Ofisa Sili o le Matagaluega o Aoga, Falanaipupu Tanielu Aiafi, ua tapena foi se tusi mo le pule aoga ma le komiti o le Kolisi a Vaimauga, ina ia toe tagatagai ai i lea mataupu.
Faaalia e Falanaipupu, e moni e lē faamalosia le fai o laugatogi, ae o se itu e tatau ona faatino ona e tāua tele, o se faiga e faamautu ai taumafaiga a le fanau ma amanaia ai a latou galuega na faatautaia i le tausaga atoa.
Faaalia e Falanaipupu e lē tau tulia i ni tupe le faatinoga o laugatogi ma e iai lava auala ua fautuaina ai nei le Kolisi ina ia tagai i ai auā le faataunuuina o le aso tāua mulimuli o le aoga a fanau o le Vaimauga.
O le totogiina o le pili o le vai ma le eletise, o se isi lea faafitauli tele sa faaalia e le alii pule aoga, pe a fua i le itu o pili aoga o le fanau ua lē talafeagai ma le faatinoga o ia mau fuafuaga. E talitonu le alii puleaoga, faiaoga ma kolisi, atonu o se isi faiga lea e fesoasoani ai i le mau faafitauli o loo feagai ma le aoga.
O pili aoga o loo iai mo le aoga a Vaimauga, e $60 tala mo tamaiti i le vasega iva i le 11, mo le kuata ae e $80 tala le pili mo le vasega 12 ma le 13.
O pili nei o loo ao e le komiti a le Itumalo lea e galulue soosoo tau‘au ma le Pulega o le aoga, ae ese ai le pili o suega ia e totogi o vasega e lua maualuluga o le Kolisi.
O lea ua iai le fesoasoani ua ofo mai e le Malo o Niu Sila mo aoga maualuluga ma e amata i vasega muamua e tolu o Kolisi e pei o le Vasega 9 i le Vasega 11 – atonu o le a iai se faamāmā avega mo le Kolisi a Vaimauga pe afai e amata lea fesoasoani, ae o le taimi lenei o le fautuaga ua tuu atu e le Matagaluega o Aoga i le Kolisi, fai pea le laugatogi latou pe na o se lotu ma le tufatufaina o tusipasi o tamaiti ua lava lea, ae ia iai se aso faapitoa e faauma lelei ai aoga a le fanau.
