O le masina o Novema lea na ta‘uta‘u mai e tatau ona oo atu i ai ua maua le siitaga o Tausi Soifua o le Vaega o auaunaga faasoifua maloloina a le atunuu.
O se mataupu na amata lava ona lagalaga e le Asosi a Tausi Soifua ina ua mae‘a le Tala Autu o le Tupe a le atunuu ia Iulai, ae ua lē vaaia le faatino.
O le faamatalaga a le Tamaitai Peresitene o le Asosi a Tausi Soifua, Faamanatu Nielsen, e foliga mai ua faatuatuanai foi e le Soifua Maloloina lenei auaunaga.
O le tausaga na tea nei na faaalia ai e Nielsen sa tulai mai ai foi ni fesili mai ia i latou ina ua maua ua mae‘a ona pasia e le Kapeneta se siitaga o tausi soifua, aemaise i latou o loo i lalo o le Vaega lea o auaunaga faafomai ma tausi soifua.
E uma lelei le tausaga na tea nei e lei vaaia lea tulaga.
Faasolo mai loa le tausaga lenei ma na faapea ona toe faamautu ai loa le siitaga e 1.9 miliona tala mo tausi soifua e pei ona ta‘ua.
O le tala o le tupe la o Iulai na tatau ona pasia ma amata totogi ai loa ia seleni mo tausi soifua.
O le faamatalaga a le alii Pule o lea Auaunaga lea faato‘ā amata atu i le masina o Aukuso, le Afioga Leota Laki, ua vaavaai nei le Auaunaga ina ia faataatitia lelei fuafuaga o totogi o tagata uma o loo galulue i le auaunaga ae ua lē patino le siitaga na o tausi soifua.
O lea na iai le fuafuaga o Aukuso e faatino ai la le siitaga lea pe a mae’a le faataatiaga o suiga o totogi mo tagata uma.
Mae‘a Iulai, mae‘a Aukuso, sosoo mai ma Setema ma o Oketopa lea ua taufaaiuiu e lei iai lava ma se suiga ua vaaia poo se siitaga foi.
O lea la ua folafola e tausi soifua, o le a savali ese ma a latou galuega pe a oo atu ia Novema e lei maua mai lava se siitaga mo i latou.
Ua iai foi le maliega e pei ona ta‘ua e le Pulega o le Auaunaga o le a maua uma lava tupe a tausi soifua mai i le taimi lea na tatau ona amata totogi ai mai ia Iulai seia oo ia Novema.
O le tauanau a le Tautua Samoa, e lē fia vaai atu lava ua savali ese tausi soifua mai ia latou galuega ona o loo manino le manaomia tele o lenei auaunaga i le faasolo ai o le tausiga ma togafitiga o gasegase o le atunuu ma e lagolagoina uma lava e isi auaunaga tau i le soifua maloloina lenei siitaga mo tausi soifua.
