O le taimi o le Kerisimasi ma le Tausaga Fou o taimi o tatou aiga e faatasi ai ma fai feiloaiga. O ni nai fautuaga nei i lalo atonu e fesoasoani:
• Afai e iai ni aiga, aemaise mātua matutua o faimalaga mai i Samoa mo le Kerisimasi ma le Tausaga Fou ma alo ma fanau, tautuana ma tatou i Niu Sila e siaki le Tusifolau o mātua. E ese le upu ‘Visa’ ma le upu Permit i totonu o tusifolau. O le visa o le faatagaga lena o le ulufale mai i totonu o Niu Sila. O le permit o le umi lena e tatau ona nofo ai i Niu Sila. E sili le toe apalai e tului aso pe a fia nofo umi i Niu Sila, ae aua le faatali se‘i uma aso o le pemita, ona faato‘ā tau apalai lea. E tele tupe e alu ai, e leai foi se guarantee e mafai ona toe tului aso. E faigofie ona tului pe afai e tausi i le tulafono ma aplai aso faaopoopo o mātua a o lei uma le pemita.
• O latou e faimalaga mai i Limited Purpose Visa, e lē mafai ona tului pemita na, ona o loo i Niu Sila i le malaga lena na e apalai e te sau ai. Tautuana ma tagata faimalaga mai i le Limited Purpose Visa e aua le solitulafono auā e afaina ai oe pe a e fia Malaga mai i se faalavelave faafuasei i se taimi o i luma.
• A fai fiafiaga e lapataiina e aua le tago i le ava malosi ma ave se taavale, auā e lē gata i le afaina ai o lou soifua, ae afaina soifua o lou aiga i totonu o le taavale, faapea isi o i luga o le auala. Fuafua muamua ae lei tago e ave le taavale. E tatau foi ia i tatou i totonu o aiga ona aveese le key o le taavale mai sē ua onā, auā o le tatou tiute lea i ola o lē ua tago i le ava malosi, faapea nisi e afaina ai.
• Ave le laisene i le taavale auā a faatū le taavale e leoleo, e iai le aiā i le tulafono a leoleo e tāpā ai lou laisene.
• A ua se‘i lou laisene aua e te aveina se laisene sese o se isi o lou aiga i se leoleo, pe a faatū lau taavale. E tele tulafono e te lavelavea ai pe a e faaaogā sese se laisene o se isi. E lē gata ia te oe ae e lē fair lou faatasina atu o le isi tagata e ona le laisene lea ua e faaaogāseseina i le tulafono.
• Aua le avetaavale saosaoa. Manatua e lē gata i lou ola e afaina i se faalavelave, ae e afaina ola o lou aiga ma ni uo i totonu o se taavale e lavea o e aveina. Ia e manatua foi ola o nisi tagata o feoai i le auala, e afaina talu ai lou lē faaeteete.
• A faatū lau taavale e leoleo, ia e tautala i le sa‘o ma ta‘u lou igoa sa‘o ma lou address. Aua e te ta‘uina fua se igoa o se isi. Aua e te ta‘uina se address sese o se isi.
• A amata ona fesili atu le leoleo pe suesue oe e leoleo, pe manao leoleo e fai sau faamatalaga, aua e te faia se faamatalaga, ae fai i le leoleo, e te manao i se loia e puipuia au aiā tatau i le tulafono. Aua e te faia se faamatalaga e te lavelavea ai i le tulafono i se taimi mulimuli. O i e iai lau aiā e ta‘ua o le Bill of Rights, e te talosaga ai i se fesoasoani a se loia ae lei faia sau faamatalaga.
Puipuiga o a Tatou Fanau Laiti:
• Ia tautuana o aso fiafia, ia tatou nofouta ai lava i o tatou tiute ia tatou fanau laiti. E lē gata i le mataala pe a o i matafaga, ae ia vaai lelei tamaiti i taimi uma, ae aua le faatamala. E te lavea i le tulafono pea lē faia lou tiute e vaai tamaiti, ma puipui i latou mai puapuga.
• Aua le sasaina pe faaoolima i tamaiti pe a faalogogata. E leai, leai lave se excuse i Niu Sila nei pe a e faaoolima i tamaiti. E tatau ia i tatou o mātua ona fai ma taiala ia tatou fanau, ma faatonu lemu fanau. A iloa e fanau ava i mātua e mafai ai i le va lena ona faatonu ma a‘oa‘o fanau. O le sasa o tamaiti ua matuā faasā lava. O tiute o tatou uma e lipoti i leoleo pe a iloa ua faaoolima se tagata matua i se tamaititi.
O lo Tatou Tiute o le Puipui o o Tatou Mātua, Uso ma Tuafāfine, tusa lava pe e Leai se Sootaga Faaletagata:
E leai se aogā tatou te o ai i le lotu, pe a lē maua le alofa e pei ona tusia i le Tusi Paia, mo lou uso a tagata. Ia ava i tagata matutua, e pei lava ona tusia i le Tusi Paia, ia e ava i ou mātua.
O le tele o tulafono tusia a Niu Sila, e pei lava o tulafono tusia i le Tusi Paia. E faasā i le Tusi Paia faapea le tulafono a Niu Sila, ona e faaoolima fua i sou uso a tagata.
A ita ia savali ese ma mafaufau, ona tautala lea ma sue faatasi ma lē o e ita i ai, se auala lua te foia faatasi ai le faafitauli i le lua va.
Ia manuia le Tausaga Fou.
