O se nonogatupe mai le faalapotopotoga a le malo mo taui o faalavelave faafuasei, (Accident Compensation Corporation), o le a faatino ai lenei galuega tele a le malo, mo le fausiaina o se ofisa ma se fale e faamautu ai lona Hai-Komesina i Canberra.
O se lipoti mai le nusipepa a le malo, le Savali, o loo ta‘ua se saunoaga a le alii pule sili o le ACC, Malaeulu Lose Niumata, ua mae‘a ona faamaonia e le Komiti Faafoe a le ACC ma le Kapeneta le $15 miliona o le a tuuina atu mo lenei poloketi.
Saunoa le pule sili, o se inivesi lelei lenei, o le ala foi lea o le lagolagoina e le ACC, aemaise o lea e faamaonia pe guarantee e le Malo.
O lenei nonogatupe o le a toe totogi atu i le ACC faatasi ma le ono pasene o lona tului i tausaga taitasi.
O loo faatali nei mo ata o lenei galuega tele o loo saunia mai e le kamupani Ausetalia e ta‘ua o le BHI ma e tatau ona oo atu i le faaiuga o lenei masina ua tauaao atu nei ata mo le toe silasila a le Komiti Faafoe, ona agai ai loa lea mo le faatinoga o le galuega, lea ua iai le faamoemoe o le faaiuga o le tausaga nei e tatau ona amataina ai.
E iai nisi o galuega tāua faalemalo o le faatino ai nei ofisa o le a faatulaga i le fale, aemaise lava o le nofoaga mo le Hai-Komesina o Samoa ma nisi o i latou o le a galulue ai.
O le ACC o le a faagaioia uma faatulagaga mo le fale ma o latou foi o loo iai le aiā mo lenei fale mo le umi e tolusefulu tausaga, ona faato‘ā tuu atu ai lea i le pule a le malo.