Viia le alofa ma le agalelei o le Atua Samoa, ua tatou toe aulia mai lenei vaiaso fou i lona alofa ma lona agalelei. E moni lava upu o le Afioga a le Atua o le tagata lava ia e fuafua, ae a aunoa ma le faatasi mai o le Atua, e le mafai ona taunuu a tatou fuafuaga. O le mea lea e ao ai lava ona tatou faafoi atu ia te Ia le viiga ma le faaneetaga ona o lana pule faasoa mai pea ia i tatou lana fanau. Foi atu ia le viiga aua ua tatau ma onomea. Malo foi le folau Samoa.
Soo se tasi e manao i le atoatoa o manuia o le Atua i lona olaga, e tatau lava ona fau muamua le faavae o lona olaga ia malosi pe mautu. O loo atagia i le fetalaiga a Iesu le taua o lenei tulaga: “O se sau ia te au ma faalogo mai i au upu, ma faia e ia, ou te faailoa atu ia te outou le ua tusa i ai o ia. E tusa ia ma le tagata ua fai lona fale, ua ia eli maualalo, ua tuu le faavae i luga o le papa…” (Luka 6:47-48) Na faatusa e Iesu le tagata poto lea i le tagata valea, o le na faalogo i le upu ae le faia; mulimuli ane ua nofo lea tagata i le fale e fau i luga o le oneone.
Na tofotofoina galuega a tagata uma ia e toalua i matagi malolosi, (pei foi o matagi eseese o le olaga nei o loo afatia faalausosoo ai lo tatou lalolagi le mautu i lenei vaitau). O le iuga, e toatasi na faasaoina.
E tele ma anoano olaga faaleagaga o i totonu o le Ekalesia a le Atua ua toe malepelepe ma faaleagaina; o se faailoga o le matua moomia ona toe tilotilo i le fauina o faavae taitasi ia matua malolosi.
Fai mai se tautinoga a se tasi o tagata e faapea, i ni tausaga ua tuanai, sa ia taitaiina ai se au talai (tamaiti aoga) i le motu o Guam mo se galuega faaevagelia. Na matou taunuu i le fale talimalo ona tautala mai lea o le tagata o le fale talimalo ia te au, i se faaupuga na ou iloa mulimuli ane o se feau faaperofetaga mo matou. Fai mai lana tala a o ia tuuina mai le ki o le potu ia te au, “Lau susuga, o lou potu o le 911.” Na talie uma le matou aumalaga ona o le numera o le potu.
Lua aso mulimuli ane, ae luluina le motu atoa i se mafuie ua faamauina o le mafuie sili ona matautia o le seneturi – e tusa ma le 8.2 lona malosi. E 60 sekone le umi na lulu ai le mafuie. O totonu i le potu 911, na peiseai ua pa le lalolagi. Ona o le malosi tele o le mafuie, na pei e togi e se tasi le TV i le fola o le potu, a o le faitotoa tioata, na sei eseina mai lona tulaga ae nuti liliiina.
Na matou tamomoe ma taumafai e sosola ese e ala i se fasitepu faapitoa mo faalavelave faafuasei, ae lei mafai ona sa poloka atoa. Ona matou tutu ai lea ma le fefefe tele i lea lava tulimanu, ona ua matua leai se isi mea e mafai ona matou sao ai. Na matou faatalitali poo le a le taimi o le a pau ai le fale. Tasi le manatu ia i matou, ua oo mai le oti.
Na faafuasei ona uma le mafuie. Ua mafai foi ona matou sao ese mai le fale na matou i ai ma avatu le matou viiga ma le faafetai i le Atua. Na matou maitauina le faigofie ona matou talai atu o Iesu i tagata o le motu i lea lava taimi.
O le aso na sosoo ai, na matou asia ai le motu atoa ma maitauina ai mea ua faaleagaina. O se tasi o mea na taia ai lau vaai, o se fale talimalo fou lava faatoa uma na fauina, a o lea o le a pau. Ua gau atoa isi ona fogafale e lua, ona pio ai lea o le faavae o le fale atoa, ua foliga mai lona tu o le pio o le olo Matamata o Pisa.
Ae lei luluina le mafuie, e lei iloa se faaletonu o le fale talimalo fou lea, ona sa matagofie lona tino mai. Ae na faaalia e le malosi o le mafuie le malosi o le faavae o loo natia i le palapala e le o iloa atu. Ona o le faaletonu o le faavae, na iu ai ina toe tala atoa i lalo lea fale talimalo.
Faafetai e lei faapena le au inisinia na latou faia le fale talimalo na matou nonofo ai. E ui i le tele o le taimi ma tupe na alu ai, ae na latou fau faatatau le faavae o lea fale talimalo i le mea o loo faatu ai – o le sone o mafuie.
E iai se lesona taua tele e tatau ona tatou aoaoina mai totonu o ia mea na tutupu, ona e faapena foi tatou; o loo tatou ola i le sone o mafuie. Ua maitauina le unai malosi mai o papa maa o le agasala mai Sasae Tu i totonu e oo atu i aoga tulagalua, ua maitaulia le faatuputeleina o le faaleagaina o tagata. A tatou fia vaai i ni olaga manumalo ma tutu malolosi e le tatau ona tatou soona tuu i lalo soo se ituaiga faavae.
“Aua e le mafai e se tasi ona tuu i se isi faavae i le ua uma ona tuuina, o Iesu le Keriso lea (1 Korinito 3:11).
E tatau ona tatou matua eli maulalo le faavae, ma aveeseina mea uma e faasiasia i le faavae o Keriso Iesu. Ia tatou faalogologo i ana Upu aemaise o le faavae o le faatuatua, ma tatou usitai i ai. O le mea foi lea, e ao ona tatou usitai pea i le Afioga a le Atua, aua o le faavae sili lea e aoaoina ai i tatou ia mautu ma mausali o tatou olaga.
“O Tusi Paia uma lava e mai le Agaga o le Atua ia, e aoga foi e aoao ai, e aoai ai, e faatonu ai, e faapoto ai foi i le Amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.”
E toatele i tatou e fiafia e fia aoaoina e pei ona talanoa mai ai le fuaiupu i luga, ae faale tele i tatou e fiafia e talisapaia le aoaoina ma le faatonuina. A o le mea moni, o mea ia e lua e eseese ai le tagata manumalo mai le tagata faiaina. E le mafai ona saunia i tatou mo galuega poo se galuega lelei, e aunoa ma le Upu a le Atua e matua galue i totonu ia i tatou. E le mafai foi ona avea i tatou ma soo e aunoa ma le iloa ona ola pulea. O ai ua faalogo i se tagata taalo, poo se fitafita, poo se faipese, poo se saienisi ua tautaua, ae lei ui i tiga ma faigata o toleniga, aemaise le tele o tulafono e tatau ona usitai? E faapena foi le tulaga e tatau ona iai i tatou ua taua o fanau a le Malamalama.
Ua tatou ola nei i totonu o le vaitau sili ona taua i talafaasolopito o le Ekalesia a le Atua i le lalolagi. Ua mafai e le poto poo le malosi faatekolosi ona tuufaatasi le lalolagi atoa, i se tulaga e foliga mai ai, ua mafai ona tatou talai atu le Tala Lelei i nuu uma, ma lanu ma gagana eseese. I totonu o lea tulaga matagofie, ua tele atili ai foi ma le matafaioi a le au kerisiano: Ia tatou ola ma savavali, ma ia aliali i o tatou lava olaga, le moni o le mana fesuiai o le feau o loo tatou talaiina.
Sa tele le aafiaga o le lalolagi na iai i lea vaitau i le molimau a le uluai ekalesia. Na aafia motu o tagata e toatele e ui lava e lei iai ni vaalele, ma ni masini komepiuta, ma le upega tafailagi (internet) – e lei iai foi ni masini faaleo tetele. O mea sa sili ona leotetele o o latou olaga suia! Na vaaia e le motu o tagata le mana fesuiai o Keriso Iesu i olaga o le au talai, i latou ia na tuua mea uma, ae mulimuli atu ia Iesu.
Tatou tatalo ia tulai mai se tupulaga fou, ua tuuina atoa i latou, e toe faafoi le lalolagi i le Amiotonu e pei ona finagalo ai le Atua. O le tatalo a le Taiala Samoa i lenei vaiaso, ia avea i tatou ma lamepa pupula, susulu atu ai le malamalama o le Atua e sulugia ai le pogisa, ia feliuaina i ao malamalama o tatou olaga ua suia e ala i lana Upu.
Faamanuia tele le Atua Samoa i feau ma galuega o lenei vaiaso.
