Ua alu le vaiaso na tea nei o faasalalau i le televise, leitio faapea ai nusipepa faaseā a le aufaifaatoaga ia ua faatau a latou meamata i isi nofoaga i Fugalei, latalata ane i le maketi sa iai i Fugalei, ona o se lipoti na ta‘ua e le TV One ua faasalalau e le Nusipepa a le Malo, le Savali, ua folafola ai e le alii Palemia e lē toe maua ni avanoa o le au faifaatoaga ia i le Maketi Fou i Fugalei, lea ua fausia.
O le faamatalaga o lea lipoti ua mafua ona faaali le lē malie o le alii Palemia ona o le lē usitai o le aufaifaatoaga ma faatau oloa nei. O le tuutuuga e agai i Vaitele i le maketi o loo iai ae ua agai ane lisi nofoaga i autafa o le maketi fou lea ua fausia, le nofoaga sa faamautu muamua ai, ma faatau ai a latou oloa ma fua o faaeleeleaga.
O le mau a le toatele ua lē usitaia le agai i Vaitele, e fai o le taugata o le la‘uina o a latou uta ma oloa i lea nofoaga, ae o lea e tele lava faatau i le taulaga o Apia.
O le tele foi o i latou sa agai i le maketi i Vaitele, ua faapea foi ona toe agai mai i le taulaga ona ua latou ta‘ua e lē taulia a latou meamata ma oloa i le maketi i Vaitele.
O le mau a nisi ua faaalia lo latou lē fiafia i lenei faaaliga, e tatau i le Palemia ona fuafua lelei ana folasaga auā e lē o faigofie le feagai ai o le aufaatau meamata ma le aufaipoloka ma le suiga o iai nei, ma o loo tau saili tupe a pisinisi laiti ae e lē o fesoasoani atu le Malo e faamautu lelei se nofoaga i totonu o le taulaga o Apia mo a latou pisinisi.
O lea la e faagasolo le galuega i le Maketi fou ma o le a tuufaatasi ai le aufaioloa i Savalalo i le Maketi lea o loo iai i le taimi lenei (fleamarket) ma i latou sa i le maketi lea e i Fugalei. O le toatele ua faamautu i le taimi lenei i le nofoaga o loo faasaga mai i isi itu e lua – o le nofoaga o le aiga o le au Vaai ma le nofoaga o le aiga o Toleafoa Faafisi lea e faipule i le taimi lenei.
O ia nofoaga e matuā lē lava lava i le toatele ua faatutū solo a latou poloka i magaala o le poloka atoa lea e iai le nofoaga lenei o le Maketi fou o loo fausia nei.
O lea foi la ua iai nisi fale fou ua amata fausia e le kamupani a Pat Ah Him auā lava le faasoa i ai o le toatele e lē o iai ni nofoaga e faamautu ai i le taimi lenei ma e mautinoa lava e mae‘a loa ona vaaia foi lea o le toatele o loo i Vaitele ua agai ane i ai.
O le faamatalaga a le afioga Maualaivao Pat Ah Him, o le manaoga lava e tali atu i le toatele o faifaatoaga ma le aufaipoloka ua lē iloa se vaega o le taulaga ua agai i ai mo le faatauina o a latou oloa na manatu ai e toe fausia se nofoaga faaopoopo mo le toatele ua moomia se fesoasoani.
E lē o silafia foi e lea alii faipule se folasaga ua faia e le Alii Palemia e pei ona lipotia e le TV One. O le faamatalaga foi a le faatonu o le Savali, e lei iai se faamatalaga faapea o se lipoti na o latou lomia ma e lē o manino pe o le TV One lava na fai i ai saunoaga a le Alii Palemia ae e lei faalogo foi ia i se folasaga faapea ua faia e le taitai o le Malo.
