Fausia hall fou Kolisi Robert Louis Stevenson

O le aulia ai e le Aoga tumaoti o le Robert Louis Stevenson o le 25 tausaga lenei o tausaga talu ona amata faavaeina i le faamoemoe e aoao ai alo ma fanau o le atunuu, ua iai nei le galuega tele ua sauni i ai le pulega o le a‘oga o le fausia lea o se hall i le nofoaga o iai le aoga maualuga i Tafaigata e faailoga ai le Iupeli siliva poo le atoaga o le 25 tausaga talu ona faavae lea aoga tumaoti i le atunuu.

O lenei galuega tele e silia i le fituselau afe lona tau i se sauniga na auai ai mātua ma le valaaulia latou te molimauina se isi laasaga fou i le siitia o le aoaoina o fanau i totonu o le aoga e le gata i le tulaga lua ae faapea le aoga mauluga a Lopati Lui Sitivinisone.

Faaalia e le tamaitai pule o le aoga tulagalua o Fiaapia Devoe o le 25 tausaga ua aulia talu ona faatuina le aoga, e maualuga tele se laasaga ua oo i ai le ola aoaoina o fanau sa faafailele e le aoga tumaoti e pei ona faamauina le toatele o tama ma teine ua iu, sa ausia ni togi maualuluga ma sili atu mai suega o le PSSC ma le School C.

E ui ina faapea e taugata pili o lea aoga tumaoti, ae na faaalia e se sui o le aoga e faalagolago uma lava le naunau o mātua e maua e fanau se aoaoga lelei i le itu tau tupe ma le tulaga gafatia. Faaalia e le tamaitai pule o le aoga tulaga lua a Robert Louis i Lotopa o Fiaapia Devoe, e maualuga le totogi o le aoga ae e toatele fanau o loo i le lisi faatalitali mo ni avanoa i vasega uma o le aoga mai lava i le tulagalua e oo i le aoga maualuga.

O le hall o le a fausia mo le aoga a Robert Louis Stevenson o le a faaaogā i taaloga ma isi fuafuaga a le fanau, ma o se vaega o le fesoasoani mai le Malo lea e tufatufa ai seleni i aoga tumaoti, o aoga a ekalesia ma aoga faataitai faapea aoga mo fanau e iai manaoga faapitoa, ua fesoasoani i le fausia o le galuega. O le isi tau atoa o le galuega o loo faatupe lava e mātua ma fanau.

O le konekarate faufale a le susuga Julius Fruean o le a feagai ma le galuega ma e 16 vaiaso o le a faatino ai.