
Ua silasila le Faalapotopotoga ole Malosi tau eletise i Samoa e fau se tulafono faatonutonu e taofia ai le toto o laau e tutupu tetele e latalata i laina o uaea eletise. Ua faaalia ele Pule Sili ole EPC le susuga Tologatā Tile Tuimalealiifano ole tele lea o laina eletise na aafia ile afā o Gita o laau na palalasi i luga o uaea malolosi.
“Ole asiasiga ale au faigaluega na aumai ai le lipoti ole tele o laina na faaleagaina o laau sa pauu iai”, ole faamatalaga lea ale Pule Sili ina ua feiloai ma tusitala ile Aso Faraile ua mavae. “Oute iloa a fausia se tulafono faapena ole a mafai loa ona molia tagata aemaise o aiga e toto laau latalata i laina eletise aemaise la e le gata ina pauu i luga o laina laau tetele ae o fale”. Ole tau atoa ole auaunaga tau eletise na faaleagaina ile afā o Gita e silia ile sefulu miliona tala ae o lea tau atoa e mamafa lava i laina eletise na pauu iai laau. “Sa faaleagaina foi nisi o fale eletise ona o matagi malolosi ma le vai na sao iai ae ole tatou fale eletise ile loto o Samasoni i Leone i Apia e lei toe osofia e tafega ale vaitafe ole Vaisigano”. Na faaalia foi e Tologata ole fale eletise lea ile loto o Samasoni na matua faaleagaina lava ile afā o Evani ia Tesema ole tausaga e 2012 ae ole toe suiga ole faataootoina o paipa tetele oloo sau ai le suavai mo le gaosia ole eletise ua le toe afaina ai i tafega tetele ale vaitafe i Vaisigano lea na matua lofia ai nofoaga ole taulaga tu lalata ile vaitafe.
Ole eletise ile motu o Savaii ua toe ola ae o Upolu na faatoa maua e aiga ma pisinisi sa afaina uaea eletise ile Aso Toonai na tea nei. Faaalia e le Pule Sili ole EPC sa tuai ona faaola ia aiga ma pisinisi ona sa faatino le galuega ia mautinoa ua saogalemu le soifua o tagata mai faaletonu na afaina ai le eletise.
Na galulue faasoloatoa le aufaigaluega ale malosi tau eletise e toe faaleleia le auaunaga talu mai lava le Aso Faraile na agai ese ai le afā o Gita ma Samoa. Ole faamalo ma le faafetai lea ale atunuu ile aufaigaluega ona e ui ina sa faitio nisi ile tuai maua ole eletise ae o lea ua toe maua lea auaunaga taua ile soifua o aso uma. Ole tulafono oloo fuafua le EPC e fausia ua tuuina atu ai se latou fautuaga ile ofisa ole Loia Sili ale Malo e silasila iai.