O ni pulega lelei i totonu o se nuu ma se afioaga e silasila matai o loo faia le nuu i atina’e e manuia ai aiga ma tagata uma o le alalafaga. O le sini foi lea o le faamoemoe o alii ma faipule o Afega ia fausia se maketi e agai i ai tagata o le nuu e faaaogā e faatau ai fua o a latou faatoaga ma galuega taulima poo nisi oloa. E lē gata e manuia ai le nuu ae manuia ai foi tagata o isi nuu ma afioaga o le a agai ane e faaaogā. Ua tu le galuega ma ua lata ina tatala ma faaaogā ae o le Aso Faraile ua mavae na foai ai e le Malo o Iapani e ala i lona Amepasa i Samoa se vaegatupe e tusa ma le $300,000 mo lea galuega.
O le agaga o le faafetai i lea Malo sa faaalia e le tofa Maulolo na avea ma sui o le nuu i le sui o le Malo o Iapani, ona o le talileleia o le latou talosaga mo se fesoasoani. Ua silafia foi ua tele maketi ua iai nei i le taulaga o Apia, e lē gata o le maketi a Toleafoa Faafisi, o le maketi a Amau, ma le maketi a Ah Liki lea ua faaaogā e le aufaifaatoaga ma pisinisi laiti. O loo iai foi le maketi i Vaitele-tai ma le maketi i Fuagalei lea o loo toe fausia. O le a tāua tele le maketi a Afega mo le toatele o le aufaifaatoaga i lea itu o Upolu aemaise o tagata faatau e fia afea mo faatauga masani e lē gata o le fofoga taumafa a o nisi oloa o le a faatauina ai.
O le foi a Iapani e tusa ma le $120,413 tala Amerika lea e maua ai le $300,000 tupe Samoa. Ua faaigoina le maketi o le Laumua o Tumua market ma o se atinae ua manatu le afioaga o le a siitia ai le tamaoaiga o le nuu. Ua 140 atinae ua fesoasoani i ai le malo o Iapani i lo tatou atunuu talu mai le tausaga e 1991. Ua faaaalia ai e le alii Amepasa o Shibuta o le atinae o le maketi o Afega o se tasi lea o faamuamua i taumafaiga faapenei ua lagolagoina e lona Malo ona o le manuia o tagata lautele. Ua faaalia ai e le Amepasa o le a lē muta ai ii le fesoasoani pea o lona Malo i atinae eseese i Samoa. O le a lē gata ina lelei le atinae o le maketi i Afega o faatoaga ae faapea mo le atinae o faiga faiva auā o le a tatala foi mo le faatauina o i‘a ma isi figota ua masani ai lo tatou atunuu e pei o sea, fugafuga, gau, asi, ma fagu vaga faapea fagu ali‘ao.a
