“E faato‘ā ou talitonu a pe a oo ina sasaa le sima o le galuega”…Tuilaepa
O le molimau a le Palemia, Susuga Tuilaepa Lupesoliai Sailele Malielegaoi, ua savali i le 42 tausaga o ta‘u ta‘u pea le faletalimalo, e lei taunuu lava ina tino mai lea miti.
O se kamupani Amerika na muamua lava omai i Samoa ma fuafua e fau le faletalimalo o le Royal Samoa hotel, peitai na uma ona tanu le nofoaga o le a fau ai le atina‘e ae ua gau tupe a lea aufaipisinisi.
O nai tausaga e lei mamao tele atu na sau ai foi se alii faipisinisi mai Niu Sila o Gordon Taylor ma toe lalaga le atina‘e o se faletalimalo i Taumeasina, peitai na mae‘a ona saini le feagaiga ma le malo e lisi ai le eleele e oo i le motu o loo iai, ae ua faaletonu foi fuafuaga a lea faipisinisi ma ua toe alu ese ma Samoa e lei vaaia lava ni foliga o se faletalimalo.
O lea la ua toe o mai nisi o faipisinisi ma o Papua Niu Kini lea ua oo i ai le faasologa o tagata fai pisinisi ua faaalia lo latou fia fausia o se faletalimalo i Taumeasina.
O le vaega ua ta‘ua o le Lemana Group e iai sootaga ma le Faletupe Tutotonu o lea Malo le Papua Niu Guinea Central Bank, o le a latou faatupea lea atina‘e tele.
O le Aso Toonai na tea nei, 17 o Mati 2012 na aloaia ai le faaiuga a le Malo e tuuina atu le eleele atoa i Taumeasina e fausia ai lea atina‘e i se sainigalima i le va o le alii Palemia o Samoa ma le Kovana o le faletupe tutotonu o lea atunuu o le Pasefika.
O le saunoaga a le taitai o le Palemia na ia toe fafagu ma faamanatu mai ai taimi ua tuanai sa ia sainia ai foi maliega poo memorandum of understanding ma isi faipisinisi ona o le faamoemoe lava o se faletalimalo i Taumeasina.
“Ua ou fiu e saini saini memorandum ae e lei tulai mai lava se atina‘e, talosia o lea o le a taunuu”.
Na faaalia e le kovana o le faletupe tutotonu o Papua Niu Kini i lana saunoaga e tali fuaitau i le alii Palemia, o se luitau o le a feagai ma le Lemana Group i le fausia o le faletalimalo e pei ona mālie le saunoaga a le taitai o le Malo.
Ua folafola foi e le alii Kovana o le a valaaulia le Palemia na te sasaaina le uluai suo sima o le faavae o le galuega i le taimi e amatalia ai.
Ua iai le fuafuaga o le isi masina atoa ma nai vaiaso ona amata lea o le galuega.
O se atina‘e tau tagata tafafao o le a manuia ai le atunuu i tupe maua ma galuega mo tagata o le a galulue ai.
E $63 miliona tala Ausetalia le tau o le atina‘e ma o le a fausia ai le faletalimalo e 70 ona potu, ma villa poo fale tetele e 30 o le a iai potu mo fonotaga ma faatasiga tetele faapea ma faleaiga ma pa pia.
