“Fatu o le Alofa” O se ata tifaga faapitoa mo le Aso Sa o Tamā

O le Aso Lulu o le vaiaso nei lea ua faamoemoe e faatauina atu ai i tua le ata tifaga fou ua faaigoaina o le Fatu o le Alofa. O lenei ata tifaga sa tusia e le faletua ia Mareta Purcell Unutoa o Nuuuli Amerika Samoa.
O le tala e faatatau i le tamaitai talavou o Rayanna o loo faatinoina e Sizzy Unutoa ma lona tina o Marina o loo faatinoina e Mareta Unutoa.
O Marina sa vaetama e se ulugalii Tutuila peitai, ina ua maliliu mātua sa vaetamaina Marina na amata ai loa ona aliali mai uiga sa lē mafaufauina e Marina e ono tulai mai i ona uso sa o latou ola faatasi a‘e.
O se ata tifaga foi e faatāuaina tele ai le sao o Tamā i totonu o se aiga. O le mafuaaga foi lea ua faapitoa ai lava lenei ata mo le Aso Sa o Tamā, auā o le tamā o le poutu toa o se aiga, ae a lē mafai e le tamā ona tauave ona tiute o le a tele se afaina e tulai mai i totonu o le aiga, e pei ona molimauina i le aiga o Marina ma Rayanna i totonu o le ata tifaga fou lenei.
O se ata tifaga o loo molimoli mai ai le matautia e ono oo i ai totonu o Aiga, pe a oo ina faumalo le matau‘a i le va tapuia o uso ma aiga. E lē gata i lea o loo faapea foi ona aumai ai i totonu o lenei ata se tasi o mafatiaga o loo feagai ma le toatele o fanau mai Samoa sa vaetamaina e tagata Amerika Samoa i tausaga e tele ua mavae, ua mavae atu mātua sa vaetamaina i latou nei, ae ua faasi‘ugutua ma faasinomia e aiga sa nonofo ai.
O loo vavane mai ai foi i totonu o lenei ata le tele o mealilo tatou te lē o silafia i le soifuaga o tagatānuu o Amerika Samoa, le motu o fiafiaga e pei ona faaigoa ai e le toatele.
O i latou o loo faatinoina lenei ata tifaga, sa auai muamua foi i nisi o ata tifaga sa pueina e le South Seas Pictures i totonu o Amerika Samoa, e pei o le TUIGA 2 ma le Tauaso le Alofa. E lata i le lua itula le umi o lenei ata tifaga fou ma ua mafai ona auina mai i Niu Sila ma Ausetalia ona o le faigapaaga a le FAMMS Production sa o latou tuufaatasia lenei ata fou faapea le Navigator Island Pictures ma le South Seas Pictures Samoa Ltd.
Na faaalia e le Susuga i le Faafeagaiga ia Sam Unutoa o le Faatonu o le FAMMS Productions, lona agaga faafetai i le South Seas Pictures Samoa Ltd, ona o i latou sa uluai pueina ata tifaga i totonu o Amerika Samoa ma koleni mai ai le toatele o alii ma tamaitai i le faatinoina o ata tifaga.
Na ia ta‘ua foi, o le Asosi a Tagata Faiata Tifaga i Amerika Samoa sa faavaeina e le tofa ia Tanupo Fiu Fogalevai Aukuso o le South Seas Pictures, sa galulue faatasi ma le FAMMS, ua mafai ai ona pueina lenei ata tifaga, ma o le taimi muamua lea ua mafai ai lava e tagata o Amerika Samoa lava ia ona pueina ma tuufaatasia se ata tifaga. O le vaiaso na tea nei sa faia ai ni faaaliga faapitoa o lenei ata tifaga i totonu o fale tifaga i Hawaii ma Amerika.
O le Aso Lulu o le vaiaso nei 28.08.13 o le a faatauina atu ai i tua lenei ata tifaga fou mai le Samoa Video Center, 56 Atkinson Avenue Otahuhu, faapea faleoloa masani e pei o le Ulutoa and Sons, Evelina Takeaways ma le RSL.
O le a faapea foi ona maua i totonu o Ueligitone, Napier ma Hastings faapea Kalaiesetete e amata atu i le Aso Tofi o le vaiaso nei lava.
O le a faia foi se faalauiloaga faapitoa ma faatau atu ai i tua lenei ata tifaga fou i le Taulaga Faatau o Otara i le Aso Lulu mai le itula e 10am seia oo i le itula e 5pm.
O le a maua ai foi pa‘ū faapitoa o ata tifaga uma lava i le Aso Lulu i totonu o le taulaga faatau a Otara.
O le a faapea foi ona faatauina atu i Night Markets i Onehunga i le po o le Aso Tofi, Papatoetoe i le po o le Aso Faraile, o le Flea Market i Mangere i le Aso Toonai ma le Night Market i Pakuranga i le po o le Aso Toonai.
E lua nisi ata tifaga o loo pueina i le taimi nei e le South Seas Pictures, o le ata ua faaigoaina o le “Matai” ma le ata ua faaigoaina “O la‘u Miti”.
Mo le silafia e le toatele o loo tuufesili poo afea e maua ai le vaega tolu o le Tuiga, ua iai le faamoemoe e tatau ona mae‘a le pueina o le vaega tolu o le Tuiga ma faatauina atu i tua, i le taimi o le Kerisimasi o le tausaga nei.