Fasi le avetaavale a o eva ma se teineitiiti aoga i Mulinuu

Na vave ona agai atu le taavale a le ofisa o Leoleo i Mulinuu i le vaiaso na tea nei ina ua logo atu e nisi se faaoogalima i se avetaavale i lea itu o le taulaga.

 
O le alii lenei e avetaavale la‘u pasese ma o se alii e faapea mai faamatalaga e fai sona aiga, o lona toalua ma lana fanau.

 
E lē o iloa lelei pe masani se tasi o alii e toatolu na o latou osofaia le avetaavale pe masani i le teine aoga na ofu atu se togiga a se tasi o aoga maualuga i le talafatai o Apia. O le teineititi lea na fai lelei evaga ma le avetaavale ma na tu le taavale i tua tonu lava o le tia o lē sa avea ma Ao o le Malo o Samoa le Susuga Malietoa Tanumafili II i Mulinuu.

 
E fai o le fasi o le avetaavale ae na faapea foi ona faaleaga ai ma vaega o le taavale, ma na taunuu atu leoleo ave loa le toatolu lea na faia le amio o le faaoolima, i le ofisa tutotonu a Leoleo.

 
E lē o iloa la i le taimi lenei pe o molia le alii avetaavale i le ave o le teine aoga, pe ua na o le faaoolima ma le faaleaga meatotino o le a feagai ma alii e toatolu ia ua aafia i lea mataupu.