“Na uma ona fasi a‘u ona latou ave faagaoi lea o a‘u meatotino”
E ui ina faapea ua lata i le lua tausaga talu ona faaoolima ni taulelea se toatolu i le aoteatea i le alii papalagi o Terry Bourke o Siusega, ae lē o galo ia te ia mafatiaga na aafia ai aemaise o manu‘a tugā na taofia ai o ia i le falemai o Tupua Tamasese Meaole i Motootua.
O Aukuso o le tausaga e 2008 a o nofonofo Terry i lona fale i Siusega o loo faamautu ai ma lona toalua ma nisi o lona aiga, na ia faalogoina se taavale o loo agai atu i lo latou fale, lea e lē mamao ma le alatele autū o le Malo poo le main road.
E lei silafia e le alii papalagi poo le ā tonu le ituaiga o taavale, ae na ia mautinoa lava o le taavale lea na o atu ai alii e toatolu na fasiina o ia, ae ave nisi o ana meatotino e pei o lana TV.
O lana molimau lea ina ua amata suesueina e le faamasinoga moliaga o le faomea ma le faaoo manu‘a tugā o loo molia ai ni alii talavou se toatolu, e aofia ai se alii o loo tuli sona faasalaga faafalepuipui i le taimi nei ona o se isi soligatulafono.
E ui o loo manatua lelei e Terry le taimi na pa‘ilima atu ai ia alii ae o loo faigata ona ia iloa ma manatua lelei foliga o taulelea.
Sa tuliloa e le loia o Semi Leung Wai o loo tulai mo le tasi o taulealea, le alii o Terry pe na te mautinoa e uumi lauulu o se tasi o taulealea na faia le faaoolima. Ae na tali le molimau na te lē iloa.
O le vaega tonu foi lea na tulitulia i le fesili a se tasi o taulealea o loo molia lea o loo tu lava ia mo ia e aunoa ma se loia.
“E te silasila mai o a‘u sa uumi lo‘u ulu pe sa pupuu”, na fesili ai le tasi o i latou o loo tuuaia. “Lau afioga i le Faamasino ou te lē o manino atoatoa i le tulaga lea”, o le tali lea a le alii papalagi.
O le lipoti a le fomai na faia suesuega o lē na tagi o loo faamauina ai i lana lipoti na tuuina atu i le faamasinoga le matuia tele o manuaga o Terry lea sa solouli ona foliga ma fula, o faailoga o le faaaogā o se malosi uigaese e faaoo ai ni manu‘a ia te ia mai le faaoogalima.
O loo talia nei se taunuuga o suesuega a le faamasinoga i molimau a leoleo ma molimau a le itu o loo tetee ona faato‘ā iloa ai lea o se taunuuga pe faamaonia pe leai foi moliaga o i latou o loo tuuaia. O le alii faamasino Ausetalia o Justice Pierre Slicer o loo faafoeina lenei faamasinoga.
