Ua taunuu aloaia mai nei i Sini le tautua a se tasi o alii pese iloga o le Tiamaa ia Vili Ieru lea ua loa ona faatauina i Niu Sa Uelese ana DVD ma CD o le Teuila, Tutoatasi ma faaili ma tagata pepese o Samoa.
O le amataga o le tausaga fou e fausia ai se Faleoloa o le Vision e na o musika lava ma ata DVD Samoa e faatauina ai i Blackett. O lea nofoaga o fafo lava o le pamu penisini a le alii Lepanona ia Sitivi lea ua fuafua nei i ai le galuega.
Na saunoa Vili Ieru i se talanoaga ma le Samoa Times, “O le nofoaga mautu lenei o le VISION MUSIC mo Sini ae peitai o le a faatau foi e le Polynesian Umu Cooker matou oloa nei i le pitonuu o Mt Pritchard ma Liverpool mo tagata Samoa e latalata ane i ai.”
E pei ona silafia e leai se faamoemoe e faia i Samoa e lē tautua i ai Vili Ieru ma le Vision Recording ma momoli mai auā le maimoa a le atunuu i Sini nei faapea Melbourne ma Brisbane. O loo iai uma foi vaega e pei o le Miss Samoa 2012 Teuila, Fusuaga a le Tautua ma le HRPP ma nisi o ata tifaga Samoa.
E lē gata o le faatauina o CD a tamafanau pepese a Samoa, ae o loo galue foi Vili Ieru i le pueina ma tusia o pese auā nisi o faaili e pei o le Vision Band aemaise lona alo ia Derek Vili Ieru. Ua loa tausaga o valavala ma nai uso o le Tiamaa, aepeitai na toe faatasi auā le pueina o le vii o le Tofa Molioo Sumeo Siitia.
O lea vii matagofie na fatuina e Vili Ieru mo se tasi o alii faasalalau tautua matavela ia Sumeo ua loa lana tautua i faafiafiaga tau faleaitu ma faasalalauga.
“O lenei pese le Vii o Molioo Sumeo e tasi lava le aso na fatuina ai auā o se uo ma se auauna mālie ma aogā tele i Samoa i soo se vaega. O le taimi muamua foi lea faato‘ā toe pepese ai ma ou uso mai le Tiamaa ia Pagamalie Iopu Faivalu ma Tavita Mose.”
E pei ona lausilafia o le Tiamaa na avea ma pele o pesepesega a Samoa i tausaga ua tea e oo mai lava i le taimi nei o loo toe usu e nisi a latou fatuga. O le taunuu mai la o Vili Ieru i Sini, o le a maua ai e le atunuu nei DVD ma CD i aso uma.
O loo toe vaaia ai nisi o Musika tuai. Mo le silafia o nuu o le susuga ia Vili Ieru o Nofoalii, Sagone ma Falelima o lona faletua ia Fitu e afio mai foi i Falelima.
