“Ua lē mafai ona la totogi le sala tupe”…Ofisa o faamasinoga
Peitai ua faailoa mai e se ofisa sinia o le vaega e totogi i ai sala i le matagaluega o faamasinoga ma mataupu tau faamasinoga, na mae‘a aso na ave i le ulugalii e tusa ma le iuga ae e lei maua atu lava se tupe.
E $2,300 le aofaiga o le salatupe a Sanele ae $800 le tamaitai o Metala. E lua vaega o le faaiuga a le tamaitai faamasino o Mata Tuatagaloa o le nofo faafalepuipui o le ulugalii poo le totogi o le salatupe.
O le solitulafono o le faia o faiga faatalitane sa molia ai i laua sa faatino mai Malololelei i le fale sa mau ai le ulugalii ma nisi o tamaitai talavou na aafia i le faatinoga o le solitulafono.
O molimau a leoleo ina ua suesue moliaga o le ulugalii na ta‘ua ai e tai 50, 30 20 tala tupe na ave e tamaloloa i tamaitai sa faaaogā e Sanele ma Metala pe a mae‘a se mafutaga faaulugalii.
Tasi lenei o solitulafono sa tele i ai lagona faaalia ina ua molia nisi tamaitai talavou i le lua tausaga ua mavae, ina ua maua e leoleo se vaega o ia tamaitai e fai se latou mafutaga tuufaatasi e fetaui i le taulaga ona agai lea i le nofoaga sa faamautu ai alii Saina sa fausia le maota faamasino fou i Mulinuu ma faatino ai a latou faiga faatalitale.
Peitai o le tulaga na oo i ai o latou moliaga o le soloia ina ua lē mafai e leoleo ona tuuina atu ni molimau e faamaonia ai, aemaise lava sa finauina e le loia sa tulai mo ia tamaitai le tatau i leoleo ona avatu mau e faasino i tamaloloa sa faaulugalii ma tamaitai ma ia avatu ma ni mau e faamaonia ai sa totogi ni tupe ia i latou mo ia gaioiga.
Peitai e lei mafai e leoleo ona tuuina atu ia mau ma toe talosaga ai le itu tagi e faaui i tua ma soloia ai i le pule a le faamasinoga.
O le nofosala ai o le ulugalii o Sanele ma Metala i le falepuipui ona ua lē gafatia ona totogi a la sala tupe, o le taunuuga lea o la moliaga sa tuuina atu i le faamasinoga e leoleo, ma o le taualuga foi lea o le mataupu lenei sa vavao ai lagona ma manatu o le atunuu ina ua lipotia faalauaitele.
