O le tuanai o nai aso talu ona mae‘a sauniga ma aso malolo o le faamanatuina o le Tutoatasi o le atunuu i le masina o Iuni o le tausaga ua mavae 2013, ae tupu mai le faalavelave i Sapapalii i le aso 4 o le masina lava lea.
O taulelea o Talosaga Teropika 33 tausaga le matua, o Tuleaga Aiesi ma Tavita Pauli ua ta‘i 24 tausaga o le soifua, e faapea folasaga a leoleo na mae‘a loa se latou inuga o se fagu malosi ma ni fagupia i le afiafi o le aso 4 o Iuni 2013, ona savavali ane lea i le alatele i Sapapalii ma latou tau atu ai i ni alii se toatolu o loo taeele i le vai taele o lo latou nuu.
Sa latou vaaia o loo inu ai ni a latou fagupia ma faamālū, ae o loo taele telenoa le isi alii. Na valaau atu le tasi o taulelea e toatolu i le vaaiga na taia ai o latou fofoga ma faailoa i ai tulafono o le vai. Peitai na tali ane se tasi o i latou i ni upu malolosi ma lafo ane ni upu masoā.
O le mafuaaga lea na oso a‘e ai le loto tiga i alii talavou o le nuu, ma latou faia loa se solitulafono o le faaoolima. O le tasi o i latou lea e faapea o se matai mai Salelavalu lea na faamālū i le vai na savali agai i le latou taavale na malaga atu ai.
O isi alii e toalua sa agai ese ma savavali atu i le taavale ae osofai loa e nisi o taulelea mai Sapapalii. O le taimi foi lea ua oo le isi o i latou i le taavale ma faatino loa le faaoolima i lē na maliu i le faalavelave.
O le folasaga a le faamasinoga na ta‘ua ai, a o faia le faaoolima lenei sa agai ane nisi o le nuu ma taumafai e vavao ma faafilemu le vevesi. Na ave le matai Salevalu i le falemai ae maliu i le aso na sosoo ai.
O isi alii e toalua na ave foi i le falemai i Tuasivi ma togafiti ai o la manu‘a. O le tasi o i laua e lē gata ina tuga ona manu‘aga ae na toulu ni ona nifo se lua. O lē na maliu na ogaoga manu‘a i ona foliga lea e faapea mai leoleo na sasa e se tasi o taulelea mai Sapapali i se fagu faamanogi taavale.
Na ioeina e i latou moliaga o le fasioti tagata pa‘ivalea ma le faaoo manu‘a. E ta‘ifitu ma le valu tausaga ua faasala ai ma le ono masina. E tolu tausaga o le faasalaga o le moliaga o le faaoo manu‘a ae o le a tuli faatasi uma.
Na faaalia e le faamasino le afioga Lesatele Rapi Vaai, a fua i upu na lafo e lē ua maliu e leai se matuia tele, ae a fua i le gaioiga na faia ma maliu ai ua sili ona ogaoga ma matuia. O le faasalaga ua faia e le faamasinoga mo i latou e toatolu na molia, o se feau tau molimoli lea i le atunuu ia i latou e faamoemoe latou te faia lea solitulafono.
