Falepuipui se isi faifeau EFKS, fasioti tagata paivalea

Ua nofosala i le falepuipui mo le 2 tausaga se tamā ua 44 tausaga o le soifua sa avea ma faifeau o le Ekalesia Faapotopotoga Kerisiano le EFKS i le afioaga o Samata i Savaii ina ua faamaonia lona moliaga o le fasioti tagata paivalea.
O le Aso Gafua, 28 o Setema 2009 na tolaulau ai le faaiuga a le faamasinoga maualuga i lenei mataupu e mafua mai i se faalavelave na tulai mai i Samata i le taimi o aso fiafia o le kerisimasi o le tausaga ua mavae lea e faapea o le po o le Aso Faraile, 26 Tesema 2008 na tupu ai.
I tolaulauga a leoleo na faaalia ai, o se moliuila na faaaoga e lē ua molia, le susuga Penaia Semo Koro, e ta ai le ulu o Mathew Pio Faasavalu, o se taulealea mai Fagafau o se pitonuu e tuaoi ma Samata i Savaii.
Sa faia se fiafia a le aulotu i le po na tupu ai le faalavelave lea na afe i ai le ua maliu, ae sa faatonuina e le ua molia nisi o taulelea o lana aulotu e aveese ona ua ona tele.
O le musu o le taulealea e alu ese na agai atu loa i ai ma le faifeau ma tulai mai ai se feseeseaiga, e pei ona sa lafo ni upu masoa ma ni upu taufaifai a le taulealea i le faafeagaiga.
O le mafuaga lea o le faaoolima loa o Penaia i le taulealea.
Na ave le na aafia i le falemai faaitumalo i Foalalo peitai e taunuu atu ua maliu, ma o le lipoti a le falemai i le mafuaaga o le maliu na faaalia ai na sao le toto poo le palapala i le faiai o Mathew le pogai lea o le uma o lona ola.
Sa finauina e le loia a Penaia le tatau i le faamasinoga ona silasila i se faaiuga talafeagai e fua i tulaga lelei uma o le ua molia e pei o le faatoa molia lea i se solitulafono, o lona faamavae mai i le tofi faifeau a o lei oo le mataupu i le pulega o le ekalesia, se vaegatupe tele na ave e lona aiga i le lauava ma isi tapenaga o le maliu, faapea ma se ifoga na faia e le Pulega a Salega i le aiga o le ua maliu.
I lana faaiuga na faaalia ai e le alii faamasino le afioga Vui Clarence Nelson, e iai moliaga o le fasioti tagata paivalea e lei faia i ai se faasalaga faafalepuipui, peitai o le moliaga o Penaia Semo Koro, e fai si matuia ma ogaoga ona o lona faaaoga o le moliuila e faia ai le faaoolima, o se aupega lava lea ua ia faaaoga e ui na te lei faia ma le mafaufauina o le a tulai mai ai se isi tulaga tuga.
E faaeteete le faamasinoga e faia se faaiuga e aunoa ma le falepuipui ona o tulaga sa laga i le tele o tupe ma taumafa na saunia e le aiga ma le ekalesia a le ua molia mo le maliu, ona e le faatauina le amiotonu a le faamasinoga.