Na vave sola lava uiga fia toa ma le mimita ae suia i loimata maligi ina ua lau le faaiuga a le faamasino e loka i le falepuipui i isi alii e toalua o le toatolu o alii talavou Salelologa lea na tausolomua i le vevesi i le va o Saletagaloa Salelologa ma Salelalavalu ia Me o le tausaga nei.
O le toatolu lea na tutulai i luma o le faamasinoga faaitumalo, e aofia ai Junior Pauli Mark Paul, Viliamu Fagaese ma Tony Fiu Tafea, ma o i latou ia na momoli e alii ma faipule o Saletagaloa i le ofisa o leoleo, e pei ona tuutala ma leoleo ina ua toe foi i le filemu le vevesi i le va o tupulaga talavou a afioaga e lua.
A’o lei tolaulauina le faaiuga a le faamasinoga, na tuualalo se tasi o matai o le afioaga Fiu Loimata i le faamasino, ma ia talosagaina le toe faaui i tua o moliaga faasaga i le toatolu ua molia, ona ua mae’a ona totogi latou sala i le nuu e tai $500 tala i le tagata e toatasi ua mae’a foi ona fai le faaleleiga i le va o alii ma faipule o Salelavalu ma Saletagaloa e ala i le ifoga.
E lē gata i lea o le mafuaaga na ala ai ona faatino e le toatolu lea le vevesi ona e mafua o tupulaga Salelavalu, oi latou na amata mea i le faatupu o le vevesi. Na faamauina e le faamasinoga le faamaulaloga mai i le sui o alii ma faipule o Saletagaloa i Salelologa i Salelavalu.
I le tolaulauga a le faamasinoga, o Junior Pauli Mark e lua moliaga o le faaleaga o meatotino ma le mautinoa.
O Viliamu Fagaese o le umia o se auupega e lamatia ai le soifua, tau’ai maa, ma le faaleaga o meatotino ma le mautinoa, a’o Tony Tiufea, o le moliaga o le umia o se auupega matautia e aunoa ma se mafuaaga tatau atoa ai ma le umia o se laau malosi e lei laiseneinaa.
I le tolaulauga o le lipoti a leoleo na faaalia o le vevesi i tupulaga talavou a Salelologa ma Salelavalu na mafua ai ona faaleagaina e i latou ua molia nisi laulau e faatau ai oloa a nisi o tina mai Salelavalu.
O loo ta’ua oi latou ua molia faatasi ma isi, sa auau faatasi i se gaioiga e faaleagaina ai meatotino a nisi oi latou na aafia i le maketi.
O Junior na ia faaleagaina se faleoloa a lē na aafia o se tina 32 tausaga o Salelavalu, o loo ta’ua foi na mae’a ona faaleagaina le laulau a le tina muamua lea ona agai ane lea i le tina lona lua o se tina mai Salelavalu lava ma faaleagaina le anoanoai o oloa e tusa lona tau aofai ma le $446.90.
O Viliamu, i le taimi ina ua tupu le vevesi sa ia te ia se maa, ma ia togiina ai le faleotiulu o se tina mai Salelavalu ma faaleagaina le tioata.
O Toni na ia umia se auupega laau malosi e aunoa ma se mafuaaga tatau, ma o suesuega a leoleo na mautinoa ai e lei lesitalaina lea laau malosi. O itu na matauina e le faamasinoga o Junior, e faapea o le po a’o lumanai le vevesi sa faaoolima ai ni taulelea Salelavalu i se tasi o ona tausoga ma sa pueina ma tuuina i luga o le social media, e le gata i lea o le faleoo na susunu o le fale o se tasi o le aiga a lona tamā, ma o le mafuaaga lea na lē fiafia ai ma tupu ai loa le vevesi.
O Viliamu o loo ta’ua, e aiga i lē na aafia lea na faaoolima iai tupulaga talavou o Salelavalu. O le taeao na ia vaaia o pasi ane le loli o loo faatumulia i tupulaga talavou o Saleologa ona mulimuli ai loa lea ma ia, o le maa sa ia te ia na ia faaaogāina e togi ai se tasi o faleotiulu e umia e se tina mai Salelavalu.
O Tony na piliati i le maketi ae taunuu atu loa le loli o loo tumu atu i tupulaga talavou Salelologa, o le taimi na vevesi ai na tuuina atu loa e se tasi ia te ia le fana e na te taofia, ma o le taimi atoa lea na tupu ai le vevesi na ia umia le fana ma ina ua mae’a le vevesi na ia toe faafoi le fana e aunoa ma le faaaogāina.
O le faaiuga a le faamasinoga, o Junior ma Viliamu e ta’i 9 masina a le tagata e tuli ai lona faasalaga faafalepuipui i Tafaigata, a’o Tony ua poloa’iina e le faamasinoga e totogi le sala tupe e $200.00 ma ia aua ne’i toe tulai i luma o le faamasinoga i totonu o le 12 masina.
