I le mataupu muamua i Samoa ua oo ai i le faamasinoga le moliaga o le mataifale ua molia ai se alii talavou ma sona tuafafine i le aafia i le faatinoina o lea solitulafono, ua faia ai le faaiuga a le faamasinoga maualuga ua faasala ai i le lua (2) tausaga e nofosala ai i le falepuipui le tuagane, ae o le tamaitai ua ave i ai le luaselau (200) itula e faia ai galuega mo le lelei o tagata lautele e aunoa ma se totogi, ma ua ave i ai ma le tolu (3) tausaga e nofo vaavaaia ai.
O le faasalaga o le taulealea ua aiaia ai foi le lē tatau ona toe iai sona fesootaiga i le tamaitai.
E 13 moliaga o le mataifale na ioeina e i laua, ma o le tolaulauga a leoleo i se tasi o valaauga o le mataupu a o lei lauina se faaiuga, na faaalia ai o le tuagane ma le tuafafine sa ola eseese ona sa vaetama e nisi lava o le aiga e iai sootaga i o la mātua.
Nisi lipoti mai le Faamasinoga
Ua lē talia le talosaga a le loia o loo tulai mo le alii talavou o Jonathan Patrick Crichton, 21 tausaga o Malifa lea o loo molia i lona faaoo o le maliu i se alii ave taavale laitiiti la‘upasese lea na ia faaaogā ai se laau malosi.
Sa talosaga lana loia e tatala i tua i ni aiaiga e faatali ai le suesueina o molimau o lona moliaga o le fasioti tagata faamoemoeina o loo tetee i ai lē o loo molia, peitai ua talia e le faamasinoga le tetee a loia a le itu a leoleo ina ia nofo taofia pea le alii o Jonathan ona e matuiā le solitulafono o loo molia ai, aemaise e fai lava si faaeteete gata le tatala i tua ona e lamatia ai le saogalemu o tagata lautele pe a fua i lana gaioiga na fai, na mafua ai ona ia faaoo le maliu i lē na aafia.
O Ianuari faasolo atu ia Fepuari o le tausaga fou ua fuafua le faamasinoga e valaau ai molimau ma suesueina le moliaga o lea taulealea.
