“Ioe le faamasinoga o se faigauo a le fafine ma le ua maliu le mafuaaga”…Vui Clarence Nelson
Ua ioe le faamasinoga o se faigauo i le va o le toalua o Tiumalumanaia Filipo Langkilde, ma lē ua maliu i le faalavelave na mafua ai ona faatino e le tamaloa le gaioiga na maliu ai Peti Gaee, i se faalavelave na faaaoga ai e Tiumalumanaia Filipo se agaese ua faamatalaina o se sapelu, e faaoo ai ni manua tuga i le ua maliu. I le faaiuga a le faamasinoga maualuga na faaalia ai e le alii faamasino afioga Vui Clarence Nelson, o le faamatalaga i leoleo a le toalua o le ua faasalaina o loo taua ai e faapea o le mafuaaga lea o le faalavelave.
O le aso 9 o Iuni 2008 i le po poo le tea o le 11 a o momoe le ua molia ma lona toalua i lo latou fale papalagi fogafale-lua i Elise fou, na faalogoina ai le tuitui atu o se tagata i le faitotoa i luma i le vaega i lalo o le fale.
Na savavali uma ane i ai le ulugalii ma la iloa ai o le ua maliu o loo i fafo. O le taimi lea na tulai mai ai se feupuaiga i le va o Tiumalumanaia Filipo ma Peti (ua maliu) lea na fai atu ai Tiumalumanaia “Sole e te iloa e sese le taimi ua e sau ai. E te iloa o lo‘u toalua o loo e sau i ai”. O le ita tele o le ua molia na ia tagofia ai loa le agaese ma faaoo manua i le ulu, autafa o le auvae i le itu agavale, ma se vaega o le ogalima taumatau o le ua maliu lea e faapea mai faamaumauga a leoleo sa faasuava.
Sa faapea se faamatalaga a le ua molia i le ua maliu pe ulavale, ae sa tali Peti e leai e malosi ia, ma o feupuaiga ia na taunuu ai lona ina faatino le faalavelave, seia oo ina maliu Peti Gaee lea ua faaalia i le lipoti i se suesuega faapitoa i le mafuaaga o maliu, o le tele o le toto na alu le mafuaaga. Na maliu ai lava o ia i le nofoaga na tupu ai le faalavelave a o lei oo i le falemai.
E fitu tausaga ua nofosala ai i le falepuipui Tiumalumanaia Filipo Langkilde, ina ua faamaonia lona moliaga e tasi o le fasioti tagata paivalea, e mafua i le faalavelave na tupu i Elise-Fou ia Iuni o le tausaga ua mavae lea na maliu ai Peti Gaee 48 tausaga o le soifua o Vaimoso-Uta. O le osofaia o le ua maliu i le agaese na faaalia e le faamasinoga o se gaioiga na faia ma le fuafua, e ui sa le mafai e le ua maliu ona tali atu i ai ona sa faasuaava.
O le mataupu lenei sa molia muamua ai Tiumalumanaia i le moliaga o le fasioti tagata faamoemoeina, sa ia teena peitai na faaleaogaina taualumaga o le mataupu poo le mistrial, ma toe tolopo ai e fofogaina e le Faamasino Sili, lea na iu ane ina faaui ai i tua e le itu a leoleo le moliaga o le fasioti tagata faamoemoeina ae suia i le fasioti tagata paivalea. Na ioe le ua molia i lea moliaga ma o sona lelei lea i le silasila a le faamasinoga i le faia o lana faaiuga, aua ua faasaoina ai le taimi ma tupe pe ana faatino se iloiloga e valaau ai molimau. O le fitu tausaga ua nofosala ai le ua molia o le a toesea ai le taimi atoa sa nofo taofia ai i le vaaiga a leoleo.
