Falepuipui i le tau faavalea ma le gaoi

E ono tausaga ua nofosala ai i le falepuipui le alii o Joseph Lafaele o Togafuafua, ina ua faamaonia lona tau faavalea ma le ave faagaoi o meatotino a nisi, ma o se solitulafono na faaalia e leoleo e le tasi ae ua lasi ona tupu pea ma aafia ai lea alii. Na aapa le ua molia i se tusi siaki a se tina sa faigaluega ai ma ia ave faanana, ona ia saini faamalosi lea o le saini a le tina o Helen Omeri e ana le tusi siaki ae tala ai tupe tai afe tala ma le tai lima selau. O ia tupe uma sa fai ai le ivi o le ua molia.
Na iloa mulimuli ane e le tina e iai le tagata o loo talaina ana tupe i le faaaoga o lana tusi siaki, ma nanati atu loa i le faletupe ma faaleaoga atoa le tusi. Na uma lea gaioiga a Joseph ona alu lea i Savaii ua faigaluega ai i se tasi o faletalimalo i Manase lea na fesili ai se tamaitai turisi Ausetalia i le alii pe iai se nofoaga malu o le faletalimalo e loka ai tupe ma isi mea taua a le au tafafao. Na tali e iai, ma ia lokaina ai le ato a le tamaitai papalagi i se tasi o kapoti. Peitai na aapa le alii i le ato ma aveesea ai le $745 tala Ausetalia, $122 tala Amerika ma le $750 tala Samoa.
Na faanoi i le pule sei alu i le falemai ua gasegase, ae o le avanoa lea na sasao mai ai i le uafu oso i le vaa ma malaga mai i Upolu lea na ia faaalu ai tupe na sau ma ia i le fealuai i se taavale togipau poo se rental ma nofo i se faletalimalo pei o se isi turisi tafao mai fafo.
O le faatoesega a Joseph Lafaele o Togafuafua na talia e le faamasinoga, ae na teena lana augani mo se isi avanoa ona e leai nisi e tausia lona tina ma nai ona tei. O le saunoaga a le alii faamasino o Tauiliili Harry Schuster, ua le tasi ae ua lasi ana faiga solitulafono ma e leai se isi faasalaga talafeagai, ua na o le falepuipui e aoaoina ai mo le 6 tausaga.