Falepuipui i le fasioti o lona tei

E lima tausaga ua faasala ai e le Faamasinoga i le aso amata o lenei vaiaso, se alii e 31 tausaga le matua mai i le afioaga o Leauvaa ina ua faamaonia lona faaoo o le oti i le tama a lona tuafafine i le amataga o le tausaga.
O le ava malosi lava ua vaaia ai le toatele o i latou ua aafia i nei soligatulafono ogaoga ma o le fasioti tagata paivalea lea na molia ai le alii o Savelio Aukusitino. Faaalia e le lipoti a leoleo o Ianuari o le tausaga lenei sa iai se mafutaga na fai ai se inuga ava a Aukusitino ma le tama lea a lona tuafafine e igoa ia Emelio.
O le inuga lea na tulai mai ai se feeseeseaiga ma iu ai ina fufusu le toalua ua aafia i lenei mataupu. O se maa na ta‘ua e Leoleo na aapa i ai le alii o Aukusitino ma tu‘i ai le ulu o lona nephew poo le atalii o lona tuafafine ma leiloa ai e Emelio se mea.
Na ave i le falemai peitai na tuai lava ni togafitiga ona o le ogaoga o manu‘a o le ulu o le alii lenei. E 20 tausaga o Emelio ae uma loa lona ola i lenei faalavelave ma ua mae‘a lava ona fai le faaleleiga ma ua amanaia foi e le Faamasinoga lea tulaga ona ua tagai o le aiga lava e tasi ma o le ava malosi lava ua mautinoa le tulai mai ai o lenei faalavelave e lei fuafuaina.
O fautuaga lava ia ua tuu mai e le Faamasinoga i le faatuputupulaia ai pea o le numera o i latou ua maliliu ona o luga o le pia.
O le alii loia o Jerry Brunt na tulai mo Aukusitino ma na faapea ona iai ma nisi e fesootai i ai lenei alii na molimau i uiga o Aukusitino aemaise le va nonofo ai ma le tuafafine ma lana fanau lea ua tulai mai ai lenei faalavelave.
E iva tausaga na amata mai ai le faasalaga o lenei alii peitai o lona ioeina o le moliaga ma faasao ai le taimi umi o le tau sailia o le sa‘o o lenei mataupu na toese ai loa nisi o tausaga e tolu, sa amanaia le faaleleiga ua faia i le va o le alii ua molia ma faamaonia lana solitulafono, ma lona tuafafine e ona le atalii ma lona foi aiga.
E le gata i lea ua aveese le isi vaega o le faasalaga lava lenei ona o le toatele na molimau i le aotelega o uiga o lē ua faasalaina nei. E ui o lea, na ta‘ua e le faamasinoga o se solitulafono ogaoga ua tulai ai Aukusitino ona ua maumau le soifua o le tagata, o se tasi foi e faasino ia te ia lava. O le faasalaga la lea na fai i ai le faaiuga a le faamasinoga o le lima tausaga e tuli ai le taimi i Tafaigata.