Ua le na o Irani ma Iraki o loo iai ni tagata o loo latou fausia ma gaosia ni pomu, e le gata e fasiotia ai nisi tagata, ae o le faaleagaina ai foi o ni meatotino e iai ma fale. E pei ona molimauina i luga o televise, o nei gaioiga o loo tele ina maliliu ai nisi i le vaega faapa pomu pule i le ola. O i latou foi nei, ua talitonu latou te sao i le Ola e Faavavau pe afai latou te faataunuuina nei mea e fasiotia ai o latou fili, e pei ona talitonu i ai nisi o atunuu i Sasae o le Lalolagi.
E ui lava e lei taua i le faamasinoga i Samoa se pomu sa faia e le alii o Penitala Lemi, 30 tausaga o Aele, lea ua falepuipui mo le ono masina, ae a fua atu i lana gaioiga sa fai, o se pomu lava na ia taumafai e faamuina ai le fale o le aiga o lona toalua. E tolu moliaga na molia ai lea alii, o le susunu fale, talepe fale ma le faaleaga meatotino.
O le na tagi i lenei mataupu, e aumau lava i Niu Sila, ae o lona maota poo lona fale, sa nonofo ai lea alii ma lona toalua. O le toalua o le ua molia, e uso la tina ma le ua tagi i lea mataupu, ae sa ave ia laua le faatuatuaga e nonofo ai i le fale i Aleisa.
Faaalia i tolaulauga a leoleo, sa faia se galuega a le aiga i le latou fale lea i le aso 21 o Aperila o le tausaga nei. Sa faapea foi ona siaki uma le fale o loo lelei mea uma ona tuua ai lea e le aiga le fale.Peitai o le aso na sosoo ai, na toe agai atu ai le ua tagi i lona fale, ma iloa ai ua talepe e se tagata lona fale, i le vaega pito i lalo o le fasitepu, o le ala lea o le tagata i totonu.
Le vaaiga i le faia o se pomu
Sa tulimatai pea e le na tagi lona fale, ma iloa ai i totonu ua alu ese le alii o Penitala e pei ona molimauina e nisi i lea afiafi. O lea na maua ai e le e ana le fale, o loo ola se moligao ma o loo tu ai i autafa se fagu fanalago ma le iliuila o loo ola. Sa faavave ona tape le moligao ma tape le iliuila, ona o le faamatalaga a le tina sa faia i leoleo, na laki o le vave i lona fale, ae toetoe lava o nai minute mu le latou fale i nei gaioiga sa faia e lea alii.
O se gaioiga na faaalia e le tina i leoleo, o le taumafaiga a lea alii ia susunu lona fale. O le isi lipoti na taua e leoleo, o le faaleagaina o le tanevai tele a le aiga ua le toe aoga i le tatuiina e lea alii i le uamea.
Mafuaaga
O le mafuaaga o lenei mataupu e pei ona agiga i le faamasinoga, o le ulugalii a le vaega lea na faamuli i le fale, ua tetea. Ua musu le fafine i amioga le taupulea ma le le mafaufau o le alii o Penitala. O faaupuga lava lea na folasia e leoleo i le Faamasinoga Maulalo, lea sa faatautaia e le alii Faamasino o Vaepule Vaemoa Vaai. E pei o uiga le migao lea o le alii o Penitala Lemi, na mafua ai loa ona tetea le la ulugalii, ma ita faamoimoi ai loa i le fale o le aiga ma alu loa ua tau susunu i le pomu lea ua le pa.
Na faatoese ma talosaga le alii faipomu i le faamasino mo sona avanoa, ua ia lagona lona salamo faamaoni i nai aso na loka ai i Tafaigata, ma o se aoaoga foi lea mo ia. Ua ia tautino e le aoga le falepuipui mo ia. E le faigofie foi le nofo i le falepuipui.
Saunoa le alii faamasino, Vaepule Vaemoa Vaai, i faamaumauga ua iloa ai o le faalua lea ona molia lea alii i le susunu fale. E ui e lei manuia lana taumafaiga lona lua, ae o lana taumafaiga muamua sa faaumatia ai se fale.
O nei moliaga e tolu, o lona faasalaga e 15 masina i le Falepuipui, peitai ona o itu lelei na toe faatalosagaina ai le faamasinoga, o lea na amata ai le fua a le faamasinoga i le iva masina, ona toese ai lea o le tolu masina sa taofia ai i le vaaiga a leoleo, o lea ua falepuipui ai loa mo le ono masina le alii faipomu.
