Falelauasi soifua o le Sunami

E ese lagona na iai le silia i le lima afe na auai i le sauniga faapitoa mo tagata uma na maliliu i le galulolo lea sa faatautaia i le malae o taaloga o le Apia Park Stadium.
A o tata malie mai le pese faanoanoa i le masini faaleotele leo, ae vaaia le loifofoga maligi o le toatele ona o le tiga matuitui o le oti ua na momotu le mafutaga ma matua pele, o uso ma tuafafine aemaise o fanau. Le taimi na ta ai le pese malu ma le faanoanoa e le faaili a leoleo a o agai ane loli ua teuteuina matagofie ma pusa maliu, sa na o le pulatoa atu o le aofia ma taitai o ekalesia faapea le alii Palemia a o tauave ane tino maliliu i luma ane o le faleie sa saunia mo le sauniga.
E oo i nai alii ma tamaitai papalagi sa auai, sa molimauina le mili o fofoga, o isi i le solosolo e tafiesea ai loimata o le alofa i e pele ua amia faafuasei ona o le faalavelave. I le saunoaga a le alii Palemia, Susuga Tuilaepa L Sailele Malielegaoi, na ia toe faailoa ane ai le galulue o taitai uma o le lalolagi e faatino ni galuega e foia ai faafitauli ua feagai nei ma atunuu uma o le lamatia o lo latou saogalemu ona o suiga tetele o le tau (climate change), e pei ona molimauina mafuie ma galulolo e le gata ua afaina ai Samoa ae o isi atunuu.
“O le oti o le iuga lava lea o i tatou uma; o le faitotoa e tasi e tatau ona tatou ulufale atu ai ona faatoa mafai ai lea ona tatou oo atu i le ola e faavavau.
Pau lava lea le Atua e, o le matou tatalo faatauanau a i matou o ola pea, tuu maia ia lava le taimi sei o matou matua tapena lelei ai, ma sauniuni mamao ai”, o se vaega lea o le saunoga a le alii Palemia.
Na ia saunoa pea ma faamatala suiga tetele o le tau ua mafua ai ona tutupu mala faalenatura.
“O le ala lea ua tupu ai se manatu i le tatou Malo sei tatou faia ia se sauniga faamanatu faapitoa mo i latou ua maliliu ona o auma fulifao e afua i mafuie malolosi ua faapogai i le feseetaiga ma le fetuleiaiga masani o papa tetele o loo taoto i le taele o eleele matutu ma vaega uma o loo ufitia i le sami, ma iu ai ina luluina atoa ma le suatai o le aliitai ma faatatafe ai loa ma le au peau e pei o ni vaitafe tafe saoasaoa ma le malolosi.
“O le itu taua i le sauniga faamanatu taua lenei o le a faamanatu ai pea ia i tatou uma le maaleale ma le matautia o le lamatia gofie o le tatou soifua faatauvaa i mala faafuasei o le natura e tutupu ma e tutupu pea, aisea, aua ua nofo fale i le lalolagi suiga tetele o le tau ua iai nei o se mataupu ua matua faataua e taitai o Malo uma o le lalolagi e aofia ai ma Samoa.
“O le a siitia ai le maualuga o le suatai ma lofia uma ai eleele tu mafola toe tulata i le gataifale i atunuu uma o le lalolagi, aua ua agai ina mafanafana le tau ma liu suavai ai mauga aisa tetele o le pole i Matu ma le pole i Saute ma agai uma ai lava ia aisa ua liusuavai i le sami.
E le gata i lea o le a aafia foi i tatou i mafuie i le itu lava lea i Saute o Samoa ona o le itu lalata o tatou atu motu i vanuvanu tetele o loo taoto i le taele o le vasa loloa i le itu i Tonga lea e fesoloai ma feseetai ai pea o latou faavae papa ma lulu ai nei mea o mafuie ma faapogai ai galulolo i le itu i Saute o Samoa ma Amerika Samoa”.
O le susuga i le taitaifono o le Fono a Ekalesia Soofaatasi, le toeaina o Oka Fauolo na taitai i le sauniga.
O le maea o le sauniga na alu atu ai le solo umi a taavale i le fanua maliu i Tafaigata, lea sa vaaia ai le toatele o le atunuu sa faaitualalua ma sauni e tauai ane a latou teu fuagalaau i taavale sa auina atu ai tino maliliu e sefulu mo sauniga mulimuli.
O le molimau a le toatele, e maeu le mamalu o le sauniga ma faatinoga o polokalame ona e leai se iota o tapenaga na faaletonu e amata mai lava i le Apua Park e oo i le fanua maliu i Tafaigata.
O le toa sefulu ua lagomau ai, o uluai tagata ia ua tanumia i le fanua maliu fou o le Malo i lea vaega o le atunuu e latalata i Aele ma Faleula ma Nuu le nofoaga o loo iai suesuega tau faatoaga a le Malo.