E fitu masina o faia le galuega tele o le savavali faataamilo i le fale sa avea ma fale tifaga i Manukau. I lea fitu masina sa na ona savavali ma tatalo, aua e na o le pau lea o le auupega sa tau ai le taua faaleagaga e ala i le faatuatua e tali mai le Atua i se aso.
O le tali sa moomia, ina ia mafai ona faatauina e le ekalesia lenei fale tele, ina ia liua e avea ma nofoaga e faataunuu ai nisi o moemitiga aua lava le faalauteleina o finagalo o le Alii ma lana faaolataga. O le atinaeina o le ekalesia e ala i galuega faatino a le aulotu, aemaise ai o isi vaega mo le agai i luma o le galuega a le Atua.
O le molimau a le susuga i le faafeagaiga ia Chris Sola o le Ekalesia Hosanna World Harvest i Manurewa, i totonu o lenei fitu masina toeitiiti o aso uma e savali ai faataamilo i aso uma o le vaiaso ma tuuina atu i le Atua i le tatalo le manaoga, aua sa le faigofie ona o le toatele foi o isi faalapotopotoga ma isi foi ekalesia sa o latou tauofo foi ina ia o latou mauaina lenei fale. E ui ina e foliga mai o se galuega fita sa faia i totonu o lenei fitu masina, ae o le Aso Lua o le vaiaso na sei mavae atu nei na galo ai ia tiga ina ua to le pule a le Atua ma tuuina atu ki o lenei fale i le susuga i le faafeagaia ia Chris Sola ma o latou ulufale ai loa i totonu ina ua avea ma a latou meatotino, ina ua malo le latou tau i le tauofoga sa faapea ona faagasolo mai i le tele o tausaga ma masina.
O le fale lenei e silafia uma lava e le mamalu o si o tatou atunuu aua sa fai ma fale tifaga na gasolo i ai le faitau fia ma fia o tagata e matamata ai i ata tifaga i lea aso ma lea aso.
O le tausaga e 2004 sa manatu ai loa le pulega o le fale tifaga lenei ina ia faasee atu i totonu o le taulaga faatau a Manukau, ona avanoa ai loa lea o lenei fale ina ua mae‘a ona fausia le fale tifaga i le tausaga 2007.
Na taua e le susuga i le faafeagaiga ia Chris, mai lava i le tausaga 2004 ina ua o latou maua le tala e ala i le siitia atu o le fale tifaga i totonu o le taulaga faatau a Manukau, na amata mai ai loa a latou talosaga ma talotaloga e ala lea i le fia faatauina o lenei fale, e ui ina e lei iai se tupe tele a le ekalesia i lea vaitau.
I se isi faaupuga, o lenei faamanuiaga sa finauina lava i le faatuatua, e ala i le tatalo ma le anapogi e pei ona faailoa e le susuga i le alii faifeau.
E sefulufa miliona le tau na faatauina ai lenei fale tele ma o se tau ua taugata tele pe a fua atu i tupe maua ma le aofai o tagata o le ekalesia. Peitai e ui i lea tau, ae sa tumau pea le manaoga i lea nofoaga ona o le manaia ma le matagofie o lona laufanua ma le tulaga o loo tu ai.
Na taua e le susuga Chris Sola sa o latou le taliaina le tau lea ona ua taugata tele, o le ala lea na agai atu ai ma saili se isi nofoaga talafeagai i Manurewa ma o latou maua ai se tasi o fale teuoloa ma se fale lua potumoe e tusa lona tau ma le luaselau limasefulu afe tala.
O le tausaga lea na tea atu nei sa tulai mai se isi o fuafuaga ina ua iai nai vaega ua le solo lelei o le fuafuaga e pei ona iai le faatauina o lea fale, ma o le taimi tonu lena na toe agai mai ai loa i le nofoaga o loo iai le fale tifaga.
O se itu na ofo tele ai le susuga i le faafeagaiga ina ua toe taliu ane ma iloa ai, e lei taulia lava lenei fale tele, ae peitai ua iai se suiga i le tau ma ua pau maualalo mai le sefulufa miliona lea sa iai muamua.
O le masina o Novema o le tausaga lea na tea na faaalia e le susuga Chris na uluai tuuina atu ai loa le latou tau i lenei tauofoga, ma e ui i le toatele o isi sa o latou tauofo foi, peitai sa faamanuiaina e le Atua le tauofoga a le susuga i le alii faifeau ma lona faletua ma le ekalesia, ma o latou faatauina ai loa lenei fale i le fa miliona tala Niu Sila.
Na faaalia e le susuga i le faifeau lona aggaga fiafia ma le faafetai i le Atua ona o lenei faamanuiaga, aua o se moemitiga ua leva ona iai, peitai o lea lava ua tali mai le Alii e tusa ai ma Lona lava taimi atoatoa.
O le ala foi lea o le a faaigoaina ai lenei fale o le Fale o Moemitiga (Dream Center), aua e tele ni faaaliga sa faailoa mai e le Atua e ala i miti ma vaai mamao e pei ona saunoa i ai le susuga i le faafeagaiga, a o lea ua aumai tonu lava le nofoaga e faatino uma ai.
O lenei fale e pei ona silafia e le atunuu e valu lelei fale tifaga sa iai i totonu, ma o se fale e matua tele sona avanoa mo nisi o atinae.
O le finagalo foi lea o le susuga i le faafeagaiga e pei ona ia faailoa mai i le Samoa Times ina ua fesiligia poo a ni sauniga ma ni faamoemoega o le a fai i lenei fale. Na ia saunoa, o loo iai le faamoemoe e fia gaosia i totonu o lenei fale ia se nofoaga mo se Aoga Amata aua fanau laiti.
O loo iai foi le faamoemoe e fia faia ai se fale faamalositino e faaaogaina e tagata aua lava le tausiaina o le soifua maloloina ma le malosi o le tino.
E le gata i lea ae e fia faia ai foi i totonu se nofoaga e faatinoina ai ni aiga mo sauniga tetele e pei o faaipoipoga ma asofanau ma vaega uma faapena.
O loo iai foi le faamoemoe e fia fausia se nofoaga aua sauniga lotu, ma o lea nofoaga pe tusa lona faitau aofai ma le fitu selau tagata e ofi ai.
I fafo o le paka o taavale o loo fuafua e faia ai se maketi mo taeao o Aso Toonai o vaiaso taitasi, ae a oo i le aoauli o le a faia ma nofoaga e faatau oloa i totonu o taavale.
O loo iai foi le faamoemoe e fia faaaogaina lenei nofoaga e faatau ai taavale i Aso Sa uma mai le lua i le aoauli seia paia le lima i le afiafi.
Na saunoa foi le susuga i le faafeagaiga, o lenei nofoaga e tatala lea i soo se tasi, aua o le auga lea o le faamoemoe.
O le nofoaga mo tagata uma, ae o le fatu lava o le talalelei a le Atua ina ia faatalaleleiina ai tagata uma.
