O le vaiaso nei ua valoia e le ofisa o le tau i Mulinuu e ala i ana tala o le tau o loo tuuina atu i ualesi faasalalau poo leitio i lo tatou atunuu, e ono lalata ane ai i Samoa se taaviliga o matagi malolosi e faaono avea ma se isi afā (cyclone) e taia ai Samoa. O lea taaviliga o matagi o loo taoto i Matu i le vaega o loo iai le afioaga o Asau i Savaii.
O lea lipoti na faasalalau e le ofisa vaaitau i le Aso Faraile na tea nei, na lagona ai le leo o le popole o le toatele ma amata televave ai le alu o le tala e faapea o le isi afā o le a lavea ai le atunuu i le vaveao o le Aso Sa faatoa mavae atu nei.
O le leitio o le Talofa FM na latou faasalalauina foi lea lipoti, ae na aliae ai ma ni faitioga mai nisi o le aufaafofoga faasaga i lipoti sa faasalalau e lea leitio.
O le tuuaiga a se tagata na valaau i le Talofa FM na ta‘ua ai e lē sa‘o le lipoti o le tau mai lea ualesi faasalalau, ae sa‘o lipoti a isi leitio ma le TV1.
Peitai na faailoa e le alii faasalalau o Kose Tafilipepe i luga o lea leitio, e lē o se tala o le tau a le leitio auā e lē saunia e se leitio se lipoti o le tau, ae o lipoti mai le ofisa vaaitau o loo latou faasalalauina e pei foi o isi fale leitio uma i le atunuu.
O le faitioga e talitonu se tasi o alii tusitala ma faasalalau inisinia ua lē manao e faailoa lona suafa, e mafua i le popole o tagata ona o lea faatoa uma atu le isi afā, ae ua toe sau tala o le tau ua ta‘ua ai ma se isi afa.
“E masani lava i tulaga faapenei, e lē toe saga tonu le faafofoga a nisi tagata pe a sau se lipoti o le tau aemaise lava la ae faalogo atu o le isi taaviliga o matagi ua latalata mai ma faapea mai ai e ono avea ma se isi afā”.
O le mafuaaga lea na valaaulia ai e le Talofa FM se ofisa sinia o le vaai tau i Mulinuu e susū atu mo se faatalatalanoaga se‘i faamatala ai le uiga tonu o le lipoti sa tuuina atu.
O le talanoaga lea na faia i luga o lea alaleo faasalalau a le Leitio Polenisia i le gagana Samoa na faaalia ai e le ofisa sinia o le vaaitau, e faapea o taaviliga matagi o loo i Matu o Samoa e pei ona latou lipotia, o loo mamao, mamao ese lava ma le atunuu.
Peitai ua faailoa i le taimi nei ina ia tapenapena iai tagata ma lava le taimi e silafia ai ni uiga faaletonu o le tau o agai ane i le atunuu. O se fono a le komiti o faalavelave faafuasei i le vaiaso lava na tea nei, na faaiugafonoina ai le tatau i le ofisa vaaitau ona vave logo le atunuu ia latou lipoti o aso uma, i ni uiga faaletonu o le tau e matauina ia latou sailiiliga. O se faiga e vave silafia ai e tagata ma vave ai foi ona faatino tapenaga ma sauniuni.
O le vaaiga mamao a le vaaitau i taaviliga o matagi o loo taoto i Matu o Samoa talu mai le Aso Faraile ua mavae, e oo ane i le Aso Toonai na sosoo ai ua faaalia e le vaaitau ua iai ni suiga i le ala matagi o loo sau ai lea taaviliga. Peitai o loo iai pea Samoa i lapataiga o matagi malolosi i le taimi nei, e ui o loo talosia ia lē taunuu ane ia taaviliga o matagi ma avea ma afā.
O le Aso Lua o le vaiaso nei o loo iai le matega a le vaaitau e oo ane ai i le atunuu, ae o loo talosia ia suia le ala matagi ma ui atu i se itulagi ma le afea ai Samoa.
O se isi lea laasaga lelei ua faia e le vaaitau o le vave logologo puialii o le atunuu mo uiga faaletonu o le tau mo le isi lua i le tolu aso o lumanai, e fua i le mau faitioga na faasaga i lea ofisa i le tuai faasalalau o lapataiga o matagi o le afa o Eveni lea na taia ai se vaega o Samoa i le masina faaiu o le tausaga ua tea atu nei.
