O se mitamitaga mo le kalapu lakapi a le Manukau Rovers mai le pitonuu o Magele, ina ua faasilasila mai le faitaulia o le latou kalapu, ina ua ofi atu nisi o o latou sui, le tamaitai o Joan Sione e pei ona iai muamua, ma le tamaitai o Trish Hina lea ua faato‘ā ofi atu i le ‘au tele a tamaitai o le atunuu, le Black Ferns.
Ua faalauiloa mai nei suafa o le ‘au a le Black Ferns, lea ua iai tamaitai e toa 26, o i latou nei o le a tauaveina le tagavai a Niu Sila, a o latou sauniuni atu e puipuimalu lo latou tulaga siamupini i le lalolagi, e pei ona tapena i ai mo Lonetona i le masina o Setema o loo lumanai nei.
O le tamaitai o Joan Sione, le numera valu malosi a le ‘au, o se tamaitai e tupuaga Samoa, o lona tamā e mai le alalafaga o Vailoa i Faleata.
O Joan na amata ona filifilia i le Black Ferns a o a‘oga i le Kolisi a Otahuhu.
O le tamaitai o Trish Hina, o se tasi ua iloga foi le alualu i luma o lana taalo i le kalapu lakapi a tamaitai a le Manukau Rovers i taamilosaga e lua ua tuanai atu, na mafua ai ona tusiaao i ai le komiti e filifilia le ‘au tele a le atunuu, le Black Ferns.
Ta‘ua i se pepa o faamatalaga na tuuina mai, le agaga faagaeetia o le alii faiaoga a le Rovers, le susuga ia Nick Bakulich, ona o lenei tulaga faaeaina ua iai lana kalapu ina ua filifilia ni o latou sui i le ‘au tele a le atunuu.
Na ia ta‘ua lona matuā ioeina o lenei faiga filifiliga, e tusa ai ma le lelei a o le mataina foi, o le faatinoga e nei tamaitai o le taaloga.
O le filifilia foi o nisi mai lana ‘au, na ta‘ua e Bakulich, o se faalaeiau sili foi lea mo isi tamaitai uma o loo fiafia i lenei taaloga, ma iai le faanaunauga e siisii i luga le tulaga o le faatinoga o le lakapi.
Ma afai ua mafai ona fili atu i le Rovers ni tamaitai mo le Black Ferns, lona uiga o loo iai se tulaga lelei i le faatinoga o le lakapi i Magele ma isi vaiaai tuaoi o loo iai o latou tamaitai i lenei kalapu.
O le filifilia foi o nei tamaitai sa taufai ioeina ma talisapaia e o la uso taaalo.
O le aso 13 o le masina fou o Aukuso o le a tuuvaa ese atu ai le Black Ferns mo le latou uluai taaloga i Lonetona, o le a taaalo ai ma le ‘au malosi a tamaitai Aferika i Saute i le aso 20 o Aukuso.
O loo pulu faatasi le Black Ferns ma ‘au mai Uelese ma Ausetalia.
