Faimeaalofa le Matagaluega o Falepuipui ma le Faanofovaavaaia a NZ mo le misela

L-R: Uila Kirifi, Penina Ifopo, Albert Tupuola ma Tony Gibbs

O le toatele ai o soifua ua maimau ona o le faama’i o le misela aemaise lava i le fanau laiti o si o tatou atunuu i Samoa, o le mafuaaga lea o le lē nofonofo lelei ai o nisi o alo ma tamafanau a Samoa o loo galulue ma tautua i totonu o le Matagaluega o Falepuipui ma le Faanofovaavaaia i Aukilani nei.
O le taeao o le Aso Faraile a tea nei na maitauina ai le faatumulia o se tasi o vaega mo tagata asiasi atu i le Falepuipui i Mt Eden i Aukilani tutotonu i le anoanoa’i o meaalofa eseese na aao i ai le toatele o i latou o loo galulue ma tautua i lea foi Matagaluega mai falepuipui uma o loo i le sone lava a Aukilani nei ma tuufaatasia e le komiti faafoe sa amataina ma faama’itea lenei auaunaga alofa mo nai aiga o loo mafatia i faiga saua a le misela i Samoa.

O le tamaitai ia Penina Ifopo mai le afioaga o Fagaloa o le Ta’ita’ifono lea o lenei komiti faafoe ma o loo galue ai o se Education Tutor o le Pasefika i totonu o le falepuipui i Mt Eden. O le loto Samoa moni ma le agaga alofa tele i nai o tatou tagata ua fano le soifua i le faama’i, na afua ai se lagona alofa o lea tuafafine i lona atunuu, ma ia talosagaina ai le faauluuluga o le Matagaluega o Falepuipui mo se faatagana e faataunuu ai lea faamoemoe.
Na talisapaia e le Matagaluega lona fanoga ma lagolagosua malosi i ai se tasi o alo o Samoa o loo avea ma Custodial System Manager le susuga ia Uila Kirifi faapea le susuga ia Tony Gibbs o ia o le Principal Advisor Education i totonu lava o Mt Eden ma le susuga ia Albert (Pati) Tupuola se tasi o alo o Samoa ua lauiloa lona suafa, e lē gata o lana taleni siva ua lauiloa ai i le Tatau Dance Group ae o le ata tifaga Samoa ta’uta’ua o le Matai, ma o loo galue nei o ia i le Ofisa o le Faanofovaavaaia i New Lynn. O i latou la nei o loo gafa ma le tuufaatasia uma o lenei fesoasoani e tauala mai i tagata faigaluega uma o ē fia alolofa ma fesoasoani mo nai aiga mafatia i Samoa.
O loo faagasoloina pea la le aoina ma le tuufaatasia uma o nei meaalofa faatasi ai ma se seleni e maua, ona tuuina atu lea mo aiga o mafatia i Samoa.
Ma o loo iai se faamoemoega o se aso o lenei vaiaso o le a mae’a tapena ai lenei fesoasoani.