O le faamatalaga lea a se tasi o le Pulega o le Kamupani la‘u uta o le Transam ina ua tapa se faatalatalanoaga i aafiaga o le kamupani lenei ua faapea ona avea ma sui o le vaa la‘u uta o le Southern Lily 2 lea na atoa lelei le tolu vaiaso o taofi i le uafu i Pago Pago, Amerika Samoa.
“E faigata ona afea ona o le maualuluga o ana tulafono ma ua alofia e le tele o vaa la‘u uta auā e fai o le laitiiti o pisinisi e maua mai i Amerika Samoa ae o le faigata o tulafono a le Puipuiga o le Gataifale (Coast Guard).”
O le faaaliga lea a Tom Hogart le tasi o pule o lenei kamupani i Apia. O lea ua tuu atu i leoleo ma le Puipuiga o le Gataifale lenei mataupu ae o le po lava o le Aso Lua na tuua ai e le vaa la‘u uta o le Southern Lily 2 uafu ma le taulaga o Pago Pago Amerika Samoa mo Toga ma agai sa’o ai i Aukilani i Niu Sila.
O iina o le a faatali mai ai isi vaa e momoli uta ua tuai ona o le taofia o le vaa i Amerika Samoa. Ua foi atu le vaa la‘u uta mai i Samoa nei ma ua agai ma ni uta o oloa mo Aukilani ae o le afea la lea o Amerika Samoa na tulai mai ai loa le faafitauli lea o le pamu o le vaa ua iai se faaletonu.
“E lei faamaonia e oo mai i le taimi nei pe moni masalosaloga ua ono mama le pamu ma faapea ona sau ai le suauu agai i le sami,” o se faamatalaga lea a Hogart.
“Ae sa iai se faaletonu i le pamu i le taimi na tulaueleele ai i le uafu ma o siaki masani lava e faia pe a tulaueleele vaa la‘u uta i soo se uafu lea na maua ai ua le ola le pamu ma taofia ai loa”.
Faaalia e Hogart e matuā telē le tau o lea taofiga auā na iloa loa e le kamupani o le Pacific Direct Line ua tulai mai le faafitauli lea saili loa le isi vaa o lana fuavaa e agai mai e avatu le uta o oloa ia e fia vave momoli i le uafu i Aukilani lea na agai i ai le Southern Lily 2.
O le vaa o le Southern Cross lea na faapea ona agai mai ma na faafetaia le avanoa mai i le taimi vave. Na faapea foi ona aumai ma isi vaa la‘u uta e lua o le Southern Reef ma le Pacific Guardian o le a faaauau ai a la auaunaga i le taumafaiga lea ina ia toe gasolo lelei le la‘uina o uta i le va o motu o le Pasefika.
“E matuā telē lava le tupe e alu pe a tulai mai nei faafitauli ae o le taumafaiga lava ina ia iai se isi auala e mafai ai ona agai atu e tau faamalie pisinisi nei ua faaletonu”. Faaalia e Hogart e tele pisinisi ua aafia ona o lenei taofiga ae ua telē le faasao mai o le taimi ma le tupe alu ona o le itu lea ua vave ona maua le avanoa o le Southern Cross e tali mai i le tuai ma isi vaa ia e lua.
O kamupani e pei o le Yazaki Samoa EDS Ltd na taumafai lava ina ia vave oo ana uta mo kamupani taavale i Ausetalia ma e foliga mai e lua aso ua tuai ai le oo atu o le uta auā o le Aso Lulu o le vaiaso lenei na tatau ona tuua ai le uafu i Aukilani i Niu Sila mo Ausetalia.
Peitai o le po o le Aso Lua na faatoa tuua ai e le Southern Lily Amerika Samoa agai loa i Toga ma faatoa faaauau ai loa i Aukilani.
O le faaaliga a le Transam, o le tele o uta a le Southern Lily na taunuu mai lava le Southern Cross ma la‘u i le vaiaso na tea nei agai i Niu Sila ma o lea lava la e talafeagai tonu le taimi na taunuu ai ma le taimi masani e faatulagaina mo le taunuu ai o le tele o ia uta ae o lea na totogi e le Pacific Direct Line le tuai o le uta a le Yazaki EDS ma ua mae‘a feutagaiga mo le faatinoga o lea galuega.
E 15 uta (containers) a le Yazaki EDS Samoa Ltd na fuafua e vave taunuu a o lei mae‘a le masina lenei i Ausetalia ma na ta‘ua e le sui o le Transam o feutagaiga ia na faia ma le kamupani ua faasaoina mai ai se tupe tele se meamanu e totogi ona o le taumafaiga ina ia momoli lea uta tele i Ausetalia.
Sa tapa poo le ā se aotelega e mafai ona aumai o le tupe ua faaalu e le Kamupani e ana le Southern Lily2 i le tulai mai ai o lea taofiga. O le tali a Hogart e fai lava si telē o le tupe e faaalu pe a tulai mai nei faafitauli auā e fai o le toe totogi o pisinisi ia ua afaina ae o le toe totogi o isi vaa e pei ona ua iai nei suiga e taumafai e tali atu i le tuai o fela‘uaiga.
O loo ua faaopoopo i ai ma le $1 miliona tala Amerika ua faatonuina le totogi faatoa mafai ai ona alu ese le vaa lea i le amataga o le vaiaso ma e totogi i le malo o Amerika Samoa ona o lea ua agiga folafolaga e iai moliaga o le a faia i luma o le Faamasinoga faasaga i ē e pulea le vaa la‘u uta lea ona o masalosaloga i le aafiaga o le siosiomaga ona o gaioiga a lea vaa la’u uta.
E lei mamao atu foi se mataupu na faasala mai ai e Amerika Samoa e ala i le Ofisa o le Tiute le Vaa la‘u pasese o le Lady Samoa i le avatu ai o se aulakapi a le Iunivesite Aoao o Samoa peitai na iai ni faaletonu i le pasese o le vaa lea ma toe faafoi mai ai ae faasala le vaa la‘u pasese mai i Samoa nei ae uma ane suesuega ua toe totogi e Amerika Samoa le $10,000 Amerika i le kamupani vaa a Samoa.
E maualuga le manatu o le taofiga lea ua tulai mai o le Southern Lily o le a faagasolo foi i le faamasinoga ma maua ai se manino pe solitulafono le vaa la‘u uta pe leai.
