E lei faigofie ona saili se avanoa o le tusitala i le tausi o Tina Toluono Feti mo sona lagona faaalia i le taunuuga o le faamasinoga o lona toalua, lea ua faasalaina i le falepuipui i le lima tausaga ma masina e ono ina ua faamaonia ona moliaga e sefululima.
O moliaga uma ia e aofia ai le faia o ni faiga faaalatua ma faiga taufaasese na faatau ai ni fanua umia saoloto se lua. O le isi fasi fanua o se meatotino a le tina o Taufau Theresa Stowers, a o le isi o le meatotino a Rosita Bourke nee Stowers.
“Afai o le finagalo o le Atua o se sala ua tatau ona o se mea na ia faatino, ua tatau ma onomea le faasalaga e alu i le falepuipui peitai, but the other way around e iai lou talitonuga e le o selau pasene atoatoa le faaiuga.
In a way ona e iai lou talitonuga o lou toalua ua leva na ma mafuta lea foi ou te malamalama i ai i le ma‘ua mafutaga e le o se tagata e amio kuluku, na te faia ni mea faapea i nisi tagata”, o le faamatalaga lea a le tausi o Tina Toluono i sona lagona i le faaiuga ua oo i ai le faamasinoga o lona toalua.
Faaalia e le tausi o se vaega o le mataupu atoa lenei na te tuuaia ai le tina o Vaselisa Stowers, lea na molia foi i le mataupu lava lenei, ona o le mau a Tina o ia le isi e tele lona sao i le faatinoga o le solitulafono.
“Honest to God o la e silasila mai le Atua, o lou toalua e le o se tagata faapea. O le mea e sili ona leaga ona sa molimau Vaselisa i le isi faamasinoga e leai se mea a lou toalua na faia ae o lea ua sui atoa lana faamatalaga”.
O le finagalo o Tina e agai i le tina o Vaselisa Stowers ma le faamasinoga na faia i le tausaga e 2010, lea na faamaonia ai o se faiga faaalatua na faatau ese ai fanua o tina o Taufau ma Rosita.
O le masina o Mati na magalo ai mai le falepuipui Vaselisa ina ua ausia le afa o le tausaga e tasi ua tuli o lona faasalaga, ina ua manuia lana talosaga i le Komiti o le palola o loo nafa ma le iloiloina o talosaga a pagota. O le Aso Tofi, 19 o Aperila 2012 na aumai ai le faaiuga a le Faamasinoga Maualuga na fofogaina e le alii faamasino o Pierre Slicer, ua faasalaina ai Toluono Feti i le lima tausaga ma masina e ono i le falepuipui.
O le 3 tausaga ma masina e ono o le faasalaga mo le faatauina ese o le fanua o Taufau Theresa Stowers e 18 masina ua faaitiitia ai le faasalaga e 2 tausaga ma masina e ono.
O le fanua o Rosita Bourke e 18 masina ua faaitiitia ai le faasalaga e 3 tausaga. O le aofaiga o tausaga o le fasalaga e tuli eseese e lima tausaga ma masina e ono.
Ua 66 tausaga o le soifua o Toluono ma o le taimi muamua lea ua molia ma faamaonia ai i se solitulafono.
E 30 ma ona tupu tausaga o lana tautua i le Malo ma le atunuu e pei ona sa avea ma Pule Sili o le faalapotopotoga o le malosiaga faaeletise le EPC mo le 13 tausaga, seia oo ina pale i le tofi Faipule o lona itumalo o Palauli mai le paeaiga o le 2006 i le 2011.
“E tuu atu lava i luma o le Atua e faasino mai le mea e tatau ona fai.”
“Pau le mea lea ou te tilotilo i ai e tusa o fautuaga a le loia, o le isi move o le a tatau ona fai, ona o si ou toalua e ma‘i”.
Ua faailoa e le loia le Susuga Toleafoa Solomona Toailoa, o le a tuuina atu se talosaga i le faamasinoga apili e toe iloilo ai le faaiuga ua faamaonia ai moliaga o Toluono faapea le toe iloiloina o le faaiuga ua faasala ai lea tamalii.
“Within a few weeks ua tatau ona faaulu le talosaga apili”, na saunoa mai ai Toleafoa Solomona Toailoa.
