O le tele o tausaga o loo faataunuuina ai le Pasifika Festival i totonu o Aukilani, e iai lava le naunautaiga o tatou tagata Samoa o loo fai a latou pisinisi i Samoa e malaga mai ai e faalauiloa a latou oloa ma mea taulima o loo faatauina i Samoa.
Ma o le tele la o tausaga e sili atu lava i le sefulu pisinisi mai Samoa e mafai ona auai mai i lenei polokalame ma maua ai le avanoa e faatau ai a latou oloa e pei o lavalava, o mea taulima aemaise lava i meaai tuu apa e pei o siamu ma faguvai.
O nei oloa uma o loo gaosia ma tapenaina i totonu o Samoa o loo faaaogāina ai taleni ma le meaalofa o loo i o tatou tagata e ala i nei oloa.
A oo ina tapena mai le aufaipisinisi i lenei faamoemoe i tausaga taitasi, e totogi pasese aemaise o le totogiina o oloa o loo auina mai i lenei faaaliga tele a le Pasefika i Aotearoa nei. Ta’ua e nisi o faipisinisi e feololo lava le tupe maua i le Pasifika Festival i nisi o tausaga, ae o le vaega e sili ona tāua i lea polokalame, o loo maua ai le avanoa e faalauiloa ai a latou oloa i nisi o atunuu o le lalolagi.
Toaititi pisinisi ua malaga mai i le Pasifika Festival i lenei tausaga
Ua leva ona naunau le aufaipisinisi a Samoa e toe malaga mai i le faaaliga a le Pasifika Festival i lenei tausaga, ua mae’a ona totogi a latou pasese, ua mae’a foi ona faataatitia polokalame o a latou oloa e tatau ona aumai i le Pasifika Festival aemaise o le paketi o tupe e mafai ona faaalu i le totogiina o oloa o loo auina mai.
Peitai e lei mafaufauina e le komiti faafoe o le Pasifika Festival se faalavelave e ono tulai mai i totonu o Niu Sila e tusa ai ma le faalavelave na tulai mai i Kalaiesetete i le lua vaiaso ua tuanai, lea na mafua ai ona faauma faafuasei le ASB Polyfest a fanau aoga, i le vaiaso lava lena na tupu ai le faalavelave.
I le faautautaga loloto ma le tofa alualu mamao a le komiti faafoe o le Pasifika Festival mo le saogalemu lava o le mamalu o tagata lautele ina ne’i toe tulai mai se isi faalavelave faapea, lea na mafua ai ona toe taofia le polokalame lenei o le Pasifika Festival i lenei tausaga, ma o se faaiuga na faamautu i le vaiaso ua mavae a’o loma ai le Pasifika Festival i le faaiuga o le vaiaso.
O le Aso Lua na toe logoina ai le aufaipisinisi a Samoa ma isi pisinisi mai isi atunuu o le Pasefika o loo auai mai i lenei faamoemoe i tausaga taitasi ua lē mafai ona faataunuuina le polokalame o le Pasifika Festival i lenei tausaga ona o le saogalemu lava o tagata.
E lei faigofie ona talia e le aufaipisinisi lea faaiuga a le komiti faafoe ona o le popolega i le aufaipisinisi ua mae’a ona totogi a latou pasese aemaise o tupe o lea ua faaalu i le totogiina o a latou oloa e aumai ai i Niu Sila ae o lea ua toe logoina faafuasei atu latou.
Ua leai se latou mea e toe mafai ona fai ia latou tupe, ona e faigata ona toe faafoi i tua pasese aemaise ai o tupe ia ua faaalu i le totogiina o vaa o loo auina mai ai a latou oloa. Pau le tulaga na oo iai latou ina ua maua atu le tala ua leai se Pasifika Festival o le taumafai lea ia faataunuu le omai atonu e iai ni nofoaga iinei e ono faatau ai a latou oloa ma faalauiloa ai oloa ua mafai ona auina mai.
O le isi vaega o le aufaipisinisi a Samoa sa toe nonofo, ina ua latou maua le tala ua leai se polokalame, e ui lava i le puupuu o le taimi na logoina ai i latou, ae i le latou lagona e sili ai le toe nonofo lelei e sefe ai le tele o oloa e felauai, toe taumafai e aumai i tua a latou tupe sa totogi ai pasese ma totogi ai uta sa fuafua e auina mai, aemaise ai e sili ai le toe tapena lelei mai i le tausaga fou i le alofa o le Atua.
E lē toatele se aufaipisinisi na malaga mai e faataunuu le malaga mai, ae fai mai le latou talitonuga e moni lava e lē sikuea le tupe ua faaalu i pasese ma le totogiina o oloa ua aumai, ae o le vaega e sili ona tāua ia i latou ua maua lea laolao lelei e toe faalauiloa ai isi a latou oloa fou o loo gaosia i Samoa, e pei o lavalava o loo iai le tele o mamanu fou o loo fiafia iai tagata i lenei vaitaimi.
O le pisinisi o le Insider Samoa o loo gaosia ai le tele o lavalava ma le tele o mamanu fou, o le taimi muamua lenei ua mafai ona auai mai ai i le faamoemoe o le Pasifika Festival i lenei tausaga, ae ua faaalia lo laua agaga fiafia ma le agaga faafetai, ona ua mafai ona malaga ai ma vaavaai i totonu o Niu Sila, e telē le avanoa e ono auina mai ai le laua maketi i le polokalame lenei o le Pasifika Festival ma falauiloa ai, e ui e lē o taunuu le Pasifika Festival ae o loo tele se aogā o le laua malaga mo le atina’eina o le la pisinisi i Samoa ma le atina’eina o le laua aiga.
O lea ua iai lo laua faamoemoe e tapena lelei mai a la oloa i le tausaga fou i le isi faamoemoe o le Pasifika Festival.
