Faigata le tauvaga a le talo a Fiti ma le talo a Samoa

E tele ituaiga o talo ua totoina e le au faifaatoaga i Samoa ma e eseese foi o latou igoa ona o talo uma ia sa faataitai e ala i ni suesuega a le Matagaluega o Faatoaga ina ua aafia le talo Samoa lea e faaigoaina o le talo niue i le faama‘i lega.
O nisi o ia ituaiga o talo e taua o le talo fili, talo polovoli, talo sunrise ma le talo savaia lea e pei lona aano o le talo niue le mapo ma maopo i le tausami. Peitai o le tele o nei ituaiga o talo ma le lelei o lo latou aano i le taumafa e le o mafai ona tauva ai ma le talo niue mai Fiti lea o loo alumia tele i Niu Sila.
Na faaalia e le Minisita o Faatoaga le afioga Taua Kitiona Tavaga, i lana tali atu i mataupu sa laga e faipule o le Palemene i le tala faaopoopo o le Tupe, o loo ave le talo a Samoa i Niu Sila, ma e sese ai nisi faamatalaga e faapea e le o avea.
Peitai o le talo a le atunuu e tuai ona taunuu i maketi i Niu Sila ona e la‘u i vaa la‘uoloa o le sami, ae o le talo a Fiti e muamua taunuu ona e ave i vaalele. Sa laga e nisi o faipule le fesili pe aisea ua leai ai ni maketi o le talo ona ua faateleina.
Ae na saunoa le minisita o loo tele maketi ae o auala o felauaiga e mafua ai ona tuai taunuu lea fua tau faatoaga.
O loo ave foi taga talo a nisi o le au faifaatoaga i Amerika Samoa e faatau ai, ae o le faafitauli ua faaititiitia ai ona o le totogi o uta pe a taunuu i Amerika Samoa.
Na faaalia e le Pule Sili o le Faalapotopotoga o Vaa a Samoa le susuga Papalii Willie Nansen, o le tasi lea o tupe tele sa maua e le faalapotopotoga i le totogi o ia uta e ave mo Tutuila peitai ona o le taugata o totogi a Amerika Samoa o le isi lea vaatuia i le auina atu o le talo i Amerika Samoa.
E lei faaalia e le alii Minisita o Faatoaga i lana folasaga i le maota fono, pe fia ni uta o le talo mai Samoa ua ave i Niu Sila talu ona toe tatala lea maketi.
O le toe punouai o le Matagaluega o Faatoaga e saili ni auala e toe maua ai lea laau tau faatoaga o se matai‘ai a le atunuu ina ua faasaolo le faama‘i lega ma mamai uma ai talo sa iai i le atunuu i le tele o tausaga, ua mafai ai ona manuia suesuega sa faia ma toe maua le tele o ituaiga o talo ua iai nei, ua mafai ona latou faafetaui le malosi o le faama‘i lega ma le afaina ai o o latou i‘o.
E toatele tagata o le atunuu na malaga mai mo malologa o le faaiuga o le tausaga ua mavae atu nei ma le amataga o lenei tausaga fou, na faaalia lo latou maofa i le lelei o le aano o talo ua toe maua ma taumamafa ai le atunuu.