E suamalie ma faaofigofie le tāua o Afioga Paia a le Atua i le fanau Kerisiano. O le Aso Toonai i le itula e 10 i le taeao na faato‘ā faia ai faigasuega masani o le tausaga a le Ekalesia Faapotopotoga a le Atua poo le AOG i lalo lea o le itu Samoa.
I ni lipoti tusitusia mai le susuga i le failautusi aoao a le Ekalesia i Ausetalia le susuga ia Ps Tae‘auga Ropati Frost, ua mae‘a ona faia suega a Melepone ma Sini peitai o lea ua faaiu mai i Kuiniselani nei.
O le Komiti a Aoga Aso Sa i Ausetalia e aofia ai le Peresitene poo le Taitai o Autalavou Aoao a le Ekalesia i Ausetalia, le susuga ia Ps Opeta Tautalafua e alaala i Niu Sa Uelese, o ia foi sa feagai ma le faatautaia o lea suega.
O le failautusi Aoao o le susuga ia Ps Kirisimasi Hytongue (alaala i Brisbane) Teutupe Aoao-Siliana Laessen (alaala i NSW). Na iu manuia foi lea faamoemoe o le taimi masani o tapuaiga i le taeao o le Aso Sa ua tuanai, na feagai ai ma le tauvaga o le CA, ma na vaaia le tausinio ma le mataalia i le faatinoina o vaega uma.
Sa faatasia uma ekalesia e 5 a le Matagaluega mo lea tauvaga faaleagaga. E pei foi ona silafia o se tasi lenei o vaega o le sauniga e ese le mamalu ma le tāua.
Sa faatinoina lava pese faitaga a Ekalesia lava ia, ma e lei tuumāmāina foi le galuega a faamasino sa feagai ma le faamasinoina o lea tauvaga i le faamaumauina lea o vaega uma e ono lautogia ai vaega uma.
Na faia faaailoga o ipu ma talita sa tapenaina lava e le ofisa o le polokalame na faatautaia le faamoemoe.
O le iuga o suega sa feagai ai i le Aso Toonai ae lauina togi i le Aso Sa, ma o le tulaga muamua na maua lea e le tamaitai o Tiana Lega (alo o le Taitai AOAO AOG QLD) na ia maua le ipu, Tusi Paia Lapoa faatasi ai ma le faailoga tupe e $500.00.
O le tulaga lua na maua e le tofa ia Lealofi Lausei Pritchard na ia maua le Tusi Paia lapoa ma le faaailoga tupe e $400.00. Tulaga tolu na maua e le susuga ia Sapo‘e Vaoiva na ia maua le $300.00 (lona faletua o loo i le ata ona o loo tuatuagia).
Tulaga fā na maua lea e le alo o le susuga i le faafeagaiga ia Ps Toluono, na ia tauaaoina le seleni e $200.00. Tulaga lima na faamanuiaina ai le tamaitai o Bessie Pritchard na ia maua le $150.00.
