I le toe amata o malaga a le Polenisia i le va o Upolu ma Savaii i lenei masina fou, o lea ua faaaliali mai i ni lipoti le osi feagaiga o le kamupani vaalele o le Samoa Air ma le kamupani vaalele o le Coral Sun Airways i le atunuu o Kilipati, ma le faamoemoe e faia ni malaga i vaiaso taitasi i le va o Samoa ma lea atunuu o le Pasefika.
O se feagaiga foi ua fuafua e faia ai ma ni malaga togipau poo charter flights agai i isi atunuu o le Pasefika.
O se taumafaiga o le a faatino pe a taunuu se vaalele lapoa o le Samoa Air, ma o le masina fou lea o loo fuafua e amata ai lea tautua fou tau malaga a vaalele mai Samoa a ia kamupani vaalele e lua.
O malaga o le a tuua ai Samoa agai i Kilipati o le a afea ai ma le atunuu o Tuvalu, i le faamoemoe e faigofie ai mo tagata malaga mai lea vaega o le Pasefika e fia malaga mai i Samoa ona maua se tautua a ni vaalele e tuusa‘o mai lava e aunoa ma le afea o Fiti.
O loo talosaga nei le Samoa Air mo se faatagaga e mafai ai ona ia afea le atunuu tuaoi o Tonga, ma o se taumafaiga o le a lelei tele mo i latou e fia malaga i le atunuu sa masani ona maua le avanoa a o faia le tautua a le Polenisia ma le Air New Zealand i tausaga ua mavae.
