O le faatāua e le Malo o le pule mamalu a Alii ma Faipule poo matai o nuu ma afioaga e lē fesiligia auā a maopoopo pulega a matai o nuu, e maopoopo foi polokalame a le Malo o loo taumafai ai ia atinae aiga ia maua le soifua manuia i soo se vaega o le soifuaga.
Ua lē natia i tausaga ua mavae e oo mai lava i le taimi nei, le tele o mataupu ua oia ai pulega a matai ona o le va nonofo ai ma tagata o se nuu ma se afioaga pe a oo ina luka luka le gataifale ma fesoua‘ina i faafitauli o le olaga nei.
Ua iu lava ina faamamasagia ai le pulega mamalu a matai o se nuu pe a oo ina ave se mataupu i le faamasinoga ae aumai se faaiuga ua olopala ai se finagalo o Alii ma Faipule, aemaise lava o ni faaiuga e aafia ai tagata o se nuu.
O le anofale o pulega lelei a nuu e mafai ona ausia pe a malamalama matai i o latou tiute tauave ma le Tulafono Faavae poo le Constitution o le Malo o Samoa e pei ona faamamafa ai le tāua o aiātatau a tagata.
O le Aso o Tamā o Samoa o lenei tausaga ua faatāua ai e le Malo faiga faavae poo iugafono a nuu, o anofale ia o faiganuu lelei. Na saunoa le sui Palemia le tofa Fonotoe Lauofo Nuafesili Pierre Lauofo i le polokalame faapitoa a le Malo mo Tamā lea sa auai sui o nuu ma afioaga poo Pulenuu, ma ia fofola manino ai le Tulafono Faavae e tusa lava poo le ā le maopoopo ma le lelei o pulega a matai, ae a aafia aiātatau a tagata ia latou pulega, e lē noatia ai tagata i le faatino o le aiātatau lea i le fesiligia i luma o le faamasinoga o se faaiuga ua faatino.
Na manino foi le finagalo o le Sui palemia, e lē mafai i se pulega a matai ona noatia tagata mai lea aiātatau o loo mausali lona tāua i le faavae o le atunuu. O loo taoto nei i le Palemene se teuteuga o le Tulafono o Fono a Nuu poo le Village Fono Act, o le a faamalosia ai iugafono a nuu e tatau ona lesitala, ina ia mafai ona tuuina atu i le faamasinoga e faamaonia atili ai ni tulafono ua malilie i ai, e lagolago ai ni faaiuga ua autasi i ai matai o loo lotolotoi i pulega o se nuu ma se afioaga.
E iva nuu i Upolu ma Savaii ua mae‘a ona tusia a latou tulafono faavae ma ua lesitala foi i le Matagaluega o Tina ma Tamaitai, Atina‘e o Nuu ma Afioaga ma Aga Fesootai. O loo faagasolo pea le tapenaina o tulafono faavae a nisi o afioaga ma le faamoemoe o le Malo o le a lesitala ma tuuina atu loa e faaaogā i se tulaga ua avanoa i aiaiga faaletulafono ona faamalosia mo le faatonutonuina o le nonofo lelei o tagata o nuu.
O se tasi o vaega tāua i ni pulega lelei a nuu o le amanaia o tagata uma ma o latou leo. O le faatāua foi lea e ao ai ona iai se leo o tagata ua faasaga i ai se faaiuga po ua tuua‘ia, ina ia faailoa atu ai so latou lagona i ni mataupu ua tuua‘ia ai.
O nisi o nuu a molia ni tagata poo se aiga i luma o le fono a le afioaga, na ona liliu lava o matai fai le faaiuga e aunoa ma le aami o ia tagata ia oo atu e fai se latou faamatalaga pe moni tuua‘iga, ae aisea foi ua mafua ai, ae poo ai na amatamea i le faaletonu.
