Ua nofo sauni le kapeteni tautaua o le All Blacks, le alii o Tana Umaga e agai atu i lona tofiga fou, o le a galue ai nei o le faiaoga fou o le aukalapi a le Counties Manukau.
O le tofiga o Umaga na filifilia i ai a o lei faia le Kerisimasi o le tausaga na tea nei.
Ua sosoo ai nei Umaga mo lea tofiga, ina ua faamavae le faiaoga sa iai talu ai o le ‘au, le alii o Milton Haig, lea ua agai atu e fesoasoani i le aulakapi a Georgia mo a latou tapenapenaga mo le isi Ipu a le Lalolagi.
Ta‘ua e Umaga, o loo fiafia lava i lana galuega i le taimi nei, lea o loo avea asi ma faiaoga lagolago mo le ‘au a le Steelers, ma o loo naunau pea e faaauau ona galue ai.
Faaalia foi e le faatonusili o le iuni lakapi a le Counties Manukau, Andrew Maddock, le fiafia tele o le latou iuni i le tulaga o le a iai nei le avea o Umaga ma faiaoga i le latou ‘au.
Saunoa Maddock, e matuā tele ma anoanoai le tomai ma le silafia o le susuga Umaga i le faatinoga o le taaloga, ma o se mea lea ua faatalitalia ma le naunautai e le latou iuni, auā e mautinoa o le a matuā telē se faamanuiaina ai o le tupulaga talavou o le a iai i lalo o le taitaiga a lenei foi toa o le lakapi a Niu Sila.
