Tai Tuivasa sa faiaina ia Blagoy Ivanov

Ua le manuia taumafaiga a Tai Tuivasa i lana fusuaga ma Blagoy Ivanov i le UFC238 i Chicago i le Aso Sa. Na faia’ina Tuivasa ia Blagoy i le mae’a ai o le fusuaga i faitauga a laufali uma e tolu i sikoa 30-27, 30-27 ma 29-28. 

O le fusuaga a Tuivasa ma Ivanov na tomua ai fusuaga o le po i le taamilosaga UFC238. E lei umi ona amata le fusuaga ae pa’ū Tuivasa i totonu o le maea ma saputu ai tu’i malolosi a Ivanov i foliga o le alii Samoa mai Ausetalia.   E lei mafai e Tuivasa ona taofia osofaiga a Ivanov mai Bulgaria. O le 18 ai lea o manumalo a Ivanov faatusa i le 8 a Tuivasa, ae ta’i lua faia’ina ai laua uma. 

Na ta’utino Ivanov e lei faigofie le la fusuaga ma Tuivasa ona o le malosi o Tai. Na taumafai o ia e tapunia ma se avanoa e lavea ai o ia i lima o Tuivasa ona e iloa e Ivanov o le malosiaga lea o le alii Samoa. Na taumafai foi Tuivasa e faaaoga lea metotia i le amataga o le fusuaga e faaoo lima ai ia Ivanov, peitai na mataala iai le Bulgarian i le malosiaga o Tuivasa ma toso ai e ia le fusuaga e fusu pii ai i lalo. Na pue ai e Ivanov Tuivasa ma pa’ū ai le alii Samoa i lalo. O le malosiaga lea a Ivanov,  na faailoa ai iina lona tomai i fusuaga e 20 ua mae’a faatusa i le na’o le 10 fusuaga a Tuivasa.   Na ta’ua e Ivanov na matamata faalelei i fusuaga uma a Tuivasa e a’oa’o ai o ia i le ituaiga fusu e faaaoga e ia i le feiloaiga ma Tai. O iina na iloa ai e Ivanov e lelei atu ai le fusu-tu a Tuivasa nai lo le fusu-pii. I lea tulaga e tutusa ai Tuivasa ma Mark “Super Samoan” Hunt i le fusu-tu, ae tau vaivai le fusu-pii. O le taumatau i le autaliga na lavea ai Tuivasa ma pa’ū ai i le maea, ma taumafai ai Ivanov e faaaoga le “guillotine” poo le titina o Tuivasa e faauma ai o ia. Peitai, na mafai e Tuivasa ona minoi ese mai le mailei lea na loka ai o ia. Na mafai ona sola ese Tuivasa mai lima o Ivanov ma faasaga ai loa e toe osofai le Bulgarian i ana tu’i malolosi. Peitai e lei faafiti ai foi ma Ivanov, aua na togi foi ma ana ia tu’i malolosi e faafeto’ai ai lima mamafa o Tuivasa. O nei mea uma na tutupu i le taamilosaga amata.  I le taamilosaga lona lua na tau lele ai lana tu’i, na faasolomuli ai Ivanov i tua ae e lei pa’ū i lalo. Na faafeto’ai ma fesuiai tu’i malolosi a le toalua lea. Na loka ai e Tuivasa ia Ivanov i le titina malosi ae na mafai ona minoi ese Ivanov mai le titina malosi a Tai. 

I le mae’a ai o le taamilosaga lona lua, na faapea foi foliga o le taamilosaga lona tolu, ae o Ivanov na sili atu lona malosi. O le malo o Ivanov ua siitia ai lona tulaga i totonu o le UFC. 

A’o Tuivasa, o le sosoo ai lea o faia’ina e lua a le alii fusu. E lē o se tulaga lelei tele lea mo ia aua a na sosoo ana manumalo e valu ae o lea ua sosoo faia’ina e lua. 

O le isi faia’ina a Tuivasa na maua i lima o Junior dos Santos i le UFC Fightnight i le masina o Tesema 2018 i Adeliade. Sa tele le faamoemoe e manumalo Tuivasa ia Santos, faatasi ai ma Ivanov ae o lea ua sosoo ana faia’ina e lua.  E lē o iloa le fusuaga e sosoo ai mo Tuivasa. O ia lea ua tauaveina le igoa o Samoa i le taaloga ina ua litaea Mark Hunt.