(Golden Lions 74 Manu Samoa 14)
Na matuā faateia le maimoa a le lalolagi i le iuga o le taaloga faamasani a le Manu Samoa ma le Aufili a le Golden Lions i Johannesburg i Aferika i Saute, i se la taaloga faamasani a o nofo sanuni atu le Manu Samoa i se taaloga faitaulia ma le ‘au malosi a Aferika i Saute.
E tusa ai ma se lipoti o loo lipotia mai ai le matagofie o le amataga o le taaloga ina ua kolosi muamua e le Manu Samoa le laina sikoa.
E silia ma le 15,000 tagata sa maimoaina lenei taaloga i le malae faalevaomalo le Ellis Park.
O se taaloga mataina ae na iai le faaletonu i le ‘afa mulimuli o le taaloga i le solomuli tele ai o le Manu Samoa mai le tulaga o loo talitonu le toatele o tagata, e fai lava si faatamala o Samoa i lana puipui e pei ona silafia tele ai i ana taaloga na mafua ai ona maua isi sikoa.
Tautino e le alii kapeteni ia Paul Williams, o le alo o le alii lakapi iloga ia Brian Williams e faapea, e lē tatau ona avea le mamao o le faigalamaga ma nisi o faapogai i le faia‘ina ai o le Manu Samoa.
O malaga mamao faapenei o le aganuu ua tatau lava ona faamasani lelei i ai le tatou Au mo le lumanai auā e faia pea lea tulaga.
Na manaia le taaloga ina ua sikoa muamua Samoa i le alii o Alesana Tuilagi i le uluai 10 minute o le taaloga. O loo iai pea le faatuatuaga malosi i le malaga taamilo ai i Aferika i Saute o le a faamanuiaina.
Ua faamoemoe o le aso 8 o Iuni o le a taaalo ai Samoa ma Sikotilani, sosoo ai lea ma le taaloga ma Italia i le aso 15 o Iuni, ae o loo fua isi taaloga i le faamanuiaina o isi taaloga ina ia manuia ma malo ai.
Talosia ia malolosi pea tama taaalo ina ia faaeaina ai Samoa ma lona malo aemaise ai lava le atinaeina pea o le lakapi i si o tatou atunuu i Samoa.
Faagasologa o taaloga:
8th Iuni – Samoa vs Sikotilani
9th Iuni – Aferika i Saute vs Italia
15th Iuni – Samoa vs Italia
16th Iuni – Aferika i Saute vs Sikotilani
