Ua lē manuia le tagi a le kamupani o le Moatoga e pei ona avea ai nisi o sui o lea pisinisi le afioga Lupematasila Taulaga, o Oketi ma Sufali Taulaga e fai ma sui o le Moatoga na latou faaulu se su poo se tagi e $6 miliona ina ia totogi atu e le kamupani a Makesi, ona o le afi na faaumatia ai le pisinisi atoa i le masina o Novema o le tausaga e 2004.
O le masina lava o Novema na mu ai le fale mo oloa siiatoa a Makesi ma ona ofisa uma ma sosolo ane ai le afi ma aafia ai le pisinisi a le Moatoga, sa iai se faleoloa ma se fale kalapu.
O se faalavelave matautia i le vave o le sosolo o le mu na amata mai i le nofoaga o loo iai le kamupani a Makesi ma oo ane ai i le Moatoga, ma e faitau miliona meatotino tāua a ia pisinisi e lua na faatama‘ia ai.
O tuuaiga a le pulega o le Moatoga na faatūtū i le faatamala o Makesi na mafua ai ona aafia a latou meatotino.
E faapea mai faamaumauga a le faamasinoga, sa iai le talitonuga o le itu tagi, o lea faatamala e mafua i se galuega tau eletise na faia i le kamupani o Makesi i le aso na sosoo ma le aso na tupu ai le mu.
Sa tuuaia foi e le itu tagi le kamupani a Makesi i le tuai faatino o se galuega vave e logo ai le fuimu, ma le tuai o gaioiga a le leoleo o le lotoā (security officer) e valaau se fesoasoani.
I le taimi na suesueina ai molimau o le mataupu sa finauina e le loia a le itu tagi e faapea, o le faieletise na faia le faapipiina o se fesootaiga malosi mo le faaopoopoina o ni pusaaisa tetele a le kamupani, e lei oo lona agavaa ma lona tomai i le faia o lea ituaiga o galuega tau eletise.
Sa ia finauina foi le lē faia o le tiute o le kamupani i le faailoa lea i le pulega o le Malosiaga tau eletise le EPC, o le fai eletise na faia le galuega e leai sona pemita faataga na te faia ai ituaiga galuega tetele faapea.
Sa faia suesuega a ni tagata popoto faapitoa mai fafo i Niu Sila ma Ausetalia i le sailia tonu o le mafuaaga o le afi, ma o ia suesuega sa aofia ai ma leoleo.
E tolu vaega sa agai i ai suesuega o le ogai o le mu, e pei o le ono iai o se faaletonu i le auaunaga tau eletise i totonu o le kamupani, oso se tagata gaoi ma talepe fale i totonu o le kamupani ma tupu ai se isi tulaga na mafua ai le mu, poo na mafua le afi i se tagata faigaluega poo le konekarate fai eletise.
I le mae‘a o suesuega na faia ai se lipoti ma faailoa ai, e lē o le galuega a le fai eletise na mafua ai le mu. Seia vaganā ni manatu e faapea atonu o se faaletonu i fesootaiga o uaea eletise o le fale atoa pe o le pogai lea o le mu.
O le faaiuga atoa o le mataupu ua lē ta‘usalaina ai le kamupani a Makesi, ma ua faatonuina ai le itu tagi e totogi atu i le kamupani a Makesi le $2,000 tala.
O le masina o Aukuso 2010 na lauina ai le faaiuga o lenei mataupu, ae o le vaiaso ua mavae na faato‘ā taulimaina ai e le Samoa Times le faaiuga tusitusia.