Ua sosoo ai nei tausaga e tolu o manumalo pea ‘au mai Ausetalia i le Ipu o le Taamilosaga lenei o le Netipolo a tamaitai, le Trans-Tasman Netball League, lea foi ua toe sii e le ‘au a Adelaide Thunderbirds ina ua faiaina ai le Magic mai Waikato i ai e 52 – 42.
E na o le toatasi le alo o le atunuu o loo taalo ai i le Kalapu lenei, o le tamaitai o Francis Solia, o ia foi le kapeteni a le ‘au Netipolo faavaomalo a Samoa. Na fai lava si malosi tele o le ‘au a Ausetalia e pei ona faiaina ai le Magic i ‘ai e 10, na maitauina i le taaloga atoa lava le tulaga lelei i soo se vaega o le Thunderbirds, e lē gata i le puipuiga a o le taimi foi e osofai ai, lea na uma ai le kuata muamua o le taaloga ua sili a latou ‘ai i le 15 – 8. O se tasi o paga mataina o le taaloga, o le tamaitai Samoa o Farancis ma le tamaitai Ausetalia pito sili ona laititi i le Taamilosaga atoa lea na la paga o Sharni Layton, sa matuai fiu Solia e tau sue se polo i le vave o le gaioi ma le lelei o le faatinoina e Layton o le taaloga. O se tasi o vaega na fai ma faafitauli o le Magic, o le leai lea o ni polo e maua e le tamaitai Goal Shooter, o Irene Van Dyk, o le tele foi o a latou pasipasiga e lē oo lava ia Irene ona o le vave ma le malolosi o le Thunderbirds. Ua faalua ai lea ona oo le ‘au lenei a Niu Sila le Magic i le suega siamupini o le taamilosaga Netipolo lenei ae lei faamanuiaina.
O le tausaga na tea nei na sue ai lava e ‘au e lua a Ausetalia le Ipu o le Taamilosaga ina ua pusi nofo uma ‘au a Niu Sila nei.
