O loo tumau pea ona tautua taavale laiti la‘upasese o loo tutu foeuli i le itu agavale, ma o taavale lava ia sa faamamalu le suiga o le itu o le auala e feoai ai taavale i Samoa ma tatala le faaaogāina o taavale e tutu feouli i le itu taumatau i le tausaga e 2009 i le masina o Setema.
Peitai o le isi pepa o faafitauli o loo tulai mai i lea tautua ua faia ai e le Pulega o felauaiga i luga o le laueleele le Land Transport Authority (LTA), ni suiga ina ia lē gata e siitia ai le puipuiga o le saogalemu, ae ia taofia ai nisi o faafitauli e pei o le lē tausisia e avetaxi o pasese ua faatulaga, ma le galo o ni meatotino a se pasese i se taxi ae fiu e saili poo fea le fale taxi e tu ai. O nisi o faafitauli o le laiti tele lea o avanoa i totonu o nisi taxi ma o le pumoomoo ma vaapiapi ua lē logo lelei ai mo nisi tagata feoai e fai si lapopoa ma mamafa tino.
Ua faaalia e le LTA i se feiloaiga ma tusitala e amata atu i le tausaga fou ona lē toe talia ni taavale laiti la‘upasese e leai ni stand poo fale taxi e tutu ai. O lona uiga e lē toe maua se taavale la‘upasese e tutu solo i le taulaga ma saili pasese ai. O se faiga na faaalia o le a taofia ai le galo o ni meatotino a se pasese poo se faatau, ae fiu e saili le taxi e lē maua.
O le a saga malosi lea suiga fou i le aiaiga ua iai e tatau ona tusia uma i faitotoa pito i luma o taxi le igoa o le faletaavale o loo lesitala ai. O lona uiga foi la e lē tatau lava ona toe fiu e saili le taxi na galo ai se ato, se faatau poo nisi lava meatotino a pasese feoai aemaise lava o tagata tafafao mai fafo.
O le tasi o suiga o le a lē toe talia ai ni taavale o o latou afi ei lalo ifo le malosi o le 1.5. Ua na o taavale e i luga atu o lea fuainumera ma o taavale ua laiti tele e lavea i le vaega e i lalo ifo o le 1.5 le malolosi o o latou afi lea o le a lē toe talia e laisene mo se taxi.
Ua faaalia e le Pulega o feoaiga i luga o le laueleele ua tele faitioga a le atunuu i nisi o vaega e lē o lelei ai le tautua a taavale laiti la‘upasese ma o le faamoemoe o suiga fou ia taofia ai le toe tulai mai.
O le itu i le lanu o taxi o loo faamalosia pea le tatau ona vali pa‘epa‘e uma nei taavale e iloa gofie ai. E lei maluelue lava le LTA e faia se suiga i le tuu o le lanu o taavale e filifili ai se fale taxi e pei ona mananao i ai nisi o le aufaitaavale laiti la‘upasese i le atunuu.
