Faia se tuuga vaaalo va o Upolu ma Savaii

O le kalapu alo vaa o le Pualele Outrigger canoe club o loo latou tapenaina se tuuga vaaalo o fausaga mai Tahiti ma Hawaii o le a faia i le aso 25 o le masina nei o Me. O se faalua lea ona faia se tuuga faapea ua laasia ai e se tuuga vaaalo le mamao i le va o Upolu ma Savaii i le faaaogāina lea o le va o Mulifanua ma Salelologa o loo feoai ai vaa laupasese o le Malo.
Ua ave ai le lagolago a le kamupani telefoni o le Bluesky i lea faamoemoe ona o seleni uma o le a maua i le tuuga o le tuuina atu i le sosaiete mo le gasegase o le kanesa le Samoa Cancer Society auā a latou galuega mo le faalauiloaina o le matautia o le gasegase.
E $5,000 se vaegatupe a le kamupani telefoni ua faameaalofa mo lea faamoemoe tāua lea sa tauaaoina atu e le Pule sili o le Bluesky le afioga Tiafau Douglas Creevey i le sui o le kalapu alo vaa o le Pualele i le faaiuga o le vaiaso ua mavae.
O le saunoaga a le alii pule sili na ia faailoa ai le tuuina atu o le lagolago a le kamupani i le faamoemoe ona o le fia lagolago pea i soo se taumafaiga auā le puipuia o le soifua maloloina lelei o le atunuu. Ua ia faaalia foi le faaauau ai pea o lea lagolago a le kamupani i soo se atinae ma galuega fesoasoani mo le soifua maloloina.
E lima au alo vaa o le a tausinio e aofia ai le vaaalo mai le Aliyah Outrigger Canoe Club, le kalapu alo vaa a le Laumei, Nafanua, Tautai, ma le Pualele. O le faiga o le tuuga o le a amata atu i Mulifanua ona agai lea i Salelologa ma toe foi mai i Mulifanua. O le tuuga sa faia i le tausaga ua mavae o loo siamupini ai se au alo vaa mai Aukilani Niu Sila o le Fuaeee e tolu itula, 15 minute ma le 32 sekone na latou ausia i le faatinoina o le tauvaga.
Ua lē paau mai le siamupini o le 2012 ae o le vaaalo na tulaga lua i le tausaga ua mavae le auvaa lea o le Tautai ma o loo ia umia pea foi le tulaga muamua i le tele o tuuga i le va o kalapu alo vaa talu mai le amataga o lenei tausaga, ua sauni isi auvaa e faatoilalo.
Faaalia e le pelesetene o le au alo vaa o le kalapu o le Pualele le alii o Can Wendt e faamoemoe mea uma i le lelei o le tau ae afai o le a malosi le savili ma le au, o le a lē faigofie ona saili le manumalo e auvaa uma o
le a tauva.