Faia se faalauiloa saili fanau e fia avea ma faiaoga

O aso ma tausaga ua mavae a o lei tele le mau galuega faaofisa ua maua e nisi o le atunuu i nei aso ua maua o latou faailoga maualuluga, sa na o le galuega lava faafaiaoga ma le galuega faatausi soifua poo le nursing sa naunau mātua e maua ai ni avanoa o fanau e aooga ai.
E ese mai ia tomai mai le tomai faafomai i le togafitia o gasegase ma vailaau faafomai auā e lē toatele nisi na maua ai avanoa sikolasipi e aoaoina ai i fafo.
O le taimi nei e tau ama mai le tautua faatausi soifua auā o loo vaaia pea le toatele o alii ma tamaitai o loo aooga mo lea tomai, ae o le faiaoga o le molimau a le Matagaluega o Aoga a le Malo, ua tau saili ni faiaoga agavaa.
O nisi sa faiaoga ua lafoai o latou tiute ae galulue i isi galuega e sili ona lelei le totogi.
O le vaiaso nei lea ua fuafua e amata ai se faalauiloa a le Matagaluega o Aoga, Taaloga ma Aganuu, faapea le iunivesite aoao a le atunuu o loo iai le aoga faafaiaoga faapea le komisi e pulea tagata faigaluega a le Malo, e saili ai ni alii ma ni tamaitai o le a iu le taumafai e fia avea ma faiaoga.
O faiaoga o loo fai si maualalo o o latou totogi pe a fua i tausi soifua ma le vasega o leoleo, ae sili ona maualuluga totogi o galuega i isi tomai. O loo naunau le Matagaluega o Aoga ia mae‘a le latou faalauiloa i Savaii ma Upolu ua maua se ata lelei mo le sauni atu i le tausaga fou mo nisi e fia aooga faafaiaoga.