Faia i Samoa suesuega i laulaau lanumeamata tele ona tāua

O fofo o soo se gasegase e aafia ai le soifua maloloina, e maua mai i laau o le vaomatua. O fofoga foi o gasegase e maua mai i le paleni o le tausami ma ia tausami foi i meaai e saogalemu mo le soifua.

O le suesuega ua ono masina o faia e se tamaitai mai Ausetalia o Mary Taylor, o loo sailiili ai poo ā ituaiga o laulaau lanumeamata e tele ona tāua ma aogā i le tausami e puipuia ai le soifua maloloina o le tagata.

O le faalapotopotoga o tina faipisinisi o Samoa le Samoa Women’s in Business ua latou aumai lea tamaitai i le atunuu mo le faatautaia o lea suesuega, ona na faaalia e le Pelesetene o le faalapotopotoga o Adimaimalaga Tafunai, o se tasi lea o tautua a le faalapotopotoga o le tausia lelei o le soifua maloloina o tagata e ala i taumafa tatau ma paleni.

Talu ona faagasolo le suesuega ua maua nei, o le lau pele o loo numera tasi le tele o ona tāua i le soifua maloloina pe a faaaogā i meataumafa. E le gata e lelei i taumafa e faavela ae ua faaalia e Mary Taylor, e lelei foi mo salati o fualaau taumafa mata poo le green salad.

O le aofia o Samoa i lenei suesuega o loo faapea foi ona aofia ai ma atunuu o Solomona ma le setete i matu o Ausetalia lea e faapea e valusefulu ituaiga o lau pele o loo maua ai. O le lau pele ua mautinoa ma faamaonia o loo maua ai nisi o minerale silisili ona lelei e pei o le zinczin, ae tele ai foi le naitoretone (nitrogen) ma polotini.

O le poloketi o loo taitaia e Mary ma nisi o sui o le Women’s in Business e ma’ea ile masina o Iuni o le tausaga nei. E valu tausaga o galue i Samoa Mary Taylor i le USP ae tele isi tausaga sa galue ai i le SPC i Fiti lea sa galue ai i le vaega o laulaau tau faatoaga. Sa galue foi i le poloketi sa suesueina ai le laau o le talo, i le tausaga 1998.

O le a oo atu le isi vaega o le poloketi lenei i nuu ma afioaga, lea o le a faaatautaia ai ni mafutaga faaleaoaoga e faalauiloa ai le tāua o laulaau lanumeamata mo taumafa o se vailaau sili ona tāua ma lelei mo le puipuia o le soifua maloloina.

O se isi lea laasaga o le faamoemoe ina ia tulituliloa ai le sini o le poloketi ia saili laulaau lanumeamata e lelei ma saogalemu i le taumafa ma faailoa i tagata ia latou silafia. O le isi vaega o le poloketi o le suesue o tagata i le tele o meaai latou te taumafaina, a o ā foi ituaiga o meataumafa e tele ina latou faaaogāina.

Ua iai mau ua faamauina ua iloa ai le lelei o le tele o le taumafa i lau o laau e tele ai minerale ma polotini ma vaitamini, ona o le isi lea auala lelei e puipuia ai mai gasegase e pei o le kanesa ma le gasegase o le fatu.