O loo iai le auaunaga a le matagaluega o leoleo mo faafitauli e faasino i sauaga i totonu o aiga ile va o matua ma fanau poo le va foi o matua, ma e faapena foi ona iai auaunaga o loo faia e nisi o faalapotopotoga tumaoti ile atunuu e pei o le Toomaga mo e Puapuagatia ma le Mapusaga o Aiga.
Peitai o le polokalame fesoasoani a le Ekalesia Aso Fitu o le toe afio mai i Samoa lea e ta‘ua o le ADRA, o loo fia fai foi sona sao e faaitiitia ai faafitauli i totonu o aiga e pei o sauaga, le pule i le ola ma le aafia o fanau teine laiti i maitaga a o talavou o loo aooga foi.
O loo nafa nei le ADRA ma le faamaopoopoina o se polokalame e faasalalau i luga o faletelevise, faapea ma leitio aemaise o nusipepa e tala‘i atu ai fautuaga lelei ma taua e fesoasoani e fofo ai nei mau faafitauli.
O le Faatāua le Ola le isi faalapotopotoga o nafa ma galuega e foia ai faafitauli e aafia ai le soifua o tagata. Ua faaalia e le pelesetene o le ADRA le susuga Su‘a Julia Wallwork, o le matau i lenei vaitaimi ua tele lava faafitauli eseese ua aafia ai le sootaga lelei o mātua ma fanau, ma ua mafua ai ona tutupu ma aliali mai nisi o faaletonu.
O sauaga e aafia ai se tina poo le fanau foi, e pei ona saunoa Su‘a faapea le solitulafono ua taatele ma ua siitia pea, o faiga aiga fai faamalosi, le pule le uma ma le mataifale ua aafia ai le lotoifale o aiga.
O se vaega tupe e lima sefulu afe mai le PACMAS o se faalapotopotoga mo fesoasoani i auaunaga tau faasalalauga poo le media a le Malo o Ausetalia i le Pasefika, ua faaagaga lea e fausia ai e le ADRA ni polokalame i televise ma leitio e pei ona faaalia e le sui o le PACMAS o loo galulue faatasi ma le ADRA i Samoa le faletua o Lagipoiva Cherrel Jackson.
O le a faatalanoa ai nisi ua aafia i ni faafitauli e pei ona ta‘ua, ona aumai lea oo latou lagona ma manatu faaalia e faasoa atu ile atunuu ina ia faatupu manatu i tagata e saili ai avanoa lelei e fofo ai ma togafiti ni faafitauli.
O le mau a le faletua o Su‘a Julia Wallwork, o loo iai pa puipui o loo le mafai ai ona faasoa lagona ma manatu i le o mātua ma fanau e saili ai ni fofo o faafitauli, ae o se luitau lea i le polokalame ia saili ni auala e talepe ai ia pa puipui.
A aveesea ia tulaga o le a mafai ona malamalama itu uma i fafitauli ma sailia ai loa se vaifofo. O le isi o polokalame fesoasoani o loo faatino e le ADRA o le toe fausia lea o fale o nai aiga na faaleagaina e le afa o Evani ma o loo galulue ai ma nisi o faalapotopotoga mai fafo e pei o le Habitat Humanity.