O lou filifili e lagolago ma fesoasoani atu i ē o loo taumafa tapaa ina ia taofi loa, o se filifiliga aupito sili ona tāua lea. Auā foi, o lou lagolago ma lou fesoasoani atu i ē taumafa tapaa ina ia taofi loa – ua lē gata ua e faia se galuega alofa mo i latou ma lo latou soifua maloloina lelei, a o se galuega ua e faatāuaina ai foi lou lava soifua manuia ma le ola maloloina o lou aiga.
O le 31 Me 2013, ua faaigoaina o le World Smokefree Day. O lona uiga, o le aso lea o loo faatāua ai le taofia o le taumafa tapaa i le lalolagi atoa. A o le manatu autū –‘Taofi loa mo lau fanau ma lou aiga.’
O loo taatia i lenei manatu autū se lu‘i tāua mo i tatou, o ē e aiga, e masani pe uo foi ma ē o loo taumafa tapaa. Auā pe afai lava e moni lo tatou alolofa i ē taumafa tapaa, ua tatou malamalama foi i aafiaga matautia o le tapaa i le soifua o le tagata, pe lē ua tatau ea ona faia se ta galuega alofa ia te i latou? Pe lē ua tatau ona ta faamalosi i ai, lagolago i ai ma fesoasoani i ai ina ia mafai ai ona latou taofia loa le taumafa i le tapaa?
Ua i ou aao ma o tatou lima le tali o nei fesili. Pau o lea ia manatua – o le tasi gagana e masani ona faalogoina pe a feagai nai o tatou tagata ma togafitiga pe ua malomaloā se gasegase o sē pele ia i tatou ona o faiga a le tapaa e faapea – ‘Ana iloa lava.’ O le gagana foi a aiga e faapena – ‘Ana iloa lava.’
O lenei ua maua lo ta avanoa e ofoina ai la tatou fesoasoani ma lo tatou faamalosiau i ē o loo tagofia pea le tapaa ina ia taofi loa!
Avea ia le World Smokefree Day i le aso 31 o Me e fai ma amataga fou mo oe ma lou aiga, ina ua e fesoasoani ma lagolago i ē taumafa tapaa ina ia Taofi loa.
Aua foi ne‘i gata lau galuega alofa i lou aiga, ae ia faapea foi ona fesoasoani i ē o loo taumafa tapaa i lou aiga faaleekalesia, lou aiga faalegaluega, ma soo se faapotopotoga o tagata o loo e auai ai.
Mo nisi fesoasoani mo oe aemaise ē o loo taumafa tapaa ina ia Taofi loa, faafesootai numera nei:
• Quitline 0800 778 778
• Pacific Quitline Services (Aukilani ma Waitemata) 0800 86 7848
• Pasefika Smokefree Services (Counties Manukau) 09 250 5757
O loo iai tagata Samoa o loo galulue i faalapotopotoga nei e mafai ona fesoasoani atili mo oe.
