E 50 miliona tala Amerika se vaega tupe ua faaagaga e se tasi o atunuu o le atu Alapi, o Abu Dhahi United Arab Emirates, e osi ai se faiga faapaaga ma atunuu o le Pasefika i sauté.
O lenei vaega tupe tele, o le a sasaa tonu lava e fesoasoani mo tulaga tau aoaoga, o le soifuaga ma le siosiomaga manuia, o le va fealoaloai ma mafutaga soofaatasi, o le eletise, aemaise ai o le soifua maloloina. O se vaega tupe ua avanoa mo soo se atunuu lava o le Pasefika e aofia ai ma Samoa, e talosaga iai mo lona faamatuu mai mo faamoemoega e pei ona taua i luga.
O le minisita o le va i fafo o lea atunuu le alii o Sheikh Abdulah Bin Zayed Al Nahyan, o ia lea sa malaga mai mo se feiloaiga faapitoa ma taitai o atunuu uma o le Pasefika, e talanoaina ai lea fesoasoani tau seleni ma ona faatatauga.
O le fonotaga a le minisita Abdulah, ma taitai o le Pasefika o se misiterio sa lei mafaufauina, peitai e iai lona loloto ma lona taua, aua o le a le gata i le tuuina mai o le vaega tupe, ae o loo faapea foi ona afifi ai i totonu ma se manaoga, o le fia auai mai ma galulue faatasi ma le Pasefika i lenei foi itu o le kelope.
E lima aso o loo faagasolo ai le malaga a le alii Minisita ma lana aumalaga ma le faamoemoe, e fia asia ma afea le tele o atunuu e pei o Tuvalu, Fiti, Solomona, Papua New Guinea, Palau, Tonga, ma isi atunuu.
Ua maea le feiloaiga ma le taitai o le atunuu, Tuilaepa Aiono Lupesoliai Sailele Malielegaoi, ma nisi o le kapeneta i Samoa, ma le aumalaga lenei.
O le aso faraile na tea nei sa amataina ai, ma faalauiloa ai lea mafutaga mo le taimi muamua.
E le gata i lea, ao le taimi muamua foi lea o le alii Minisita mai lea atunuu, ua asia ai le vasa Pasefika i Sauté.
O le polokalame ua faataoto mo atunuu o le Pasefika, o le a vaaia ma pulea lava e le Minisita o loo asiasi mai, ae o le a faasoasoaina tupe ma talosaga e le vaega o tupe mo atinae tetele, sa faavae mai i le tausaga e 1971, a lea lava atunuu.
O le taimi nei pei ona faailoa i se pepa o faamatalaga sa tuuina mai, e tusa ma le 200 ni poloketi tetele mai atunuu eseese e 50 o le lalolagi.
Ua faamaonia mai foi i lea pepa o faamatalaga, o Tonga le atunuu ua sauni e faatoai se talosaga mo se fesoasoani tau seleni i le taimi nei, mo le toe faaleleia o le eletise i le atunuu talu ai sa faaleagaina e le afa o Rene i le vaiaso talu ai.
O le toe taliu ai o le malaga faapitoa a le alii Minisita ma lana aumalaga, o le a avanoa ai foi ma ia tupe tetele mo le tuuina mai mo atinae tetele a atunuu uma o le Pasefika, pe afai e manaomia.
E toa tolu nisi Minisita o le atunuu sa malaga faatasi mai i lenei faigamalaga, aemaise ai o sui sinia o tupe faaagaga mo isi atunuu, aofia ai ma le Amapasa o lea atunuu o loo i Ausetalia, ma minisita lagolago e toalua.
