Mo i latou uma e pa‘ū o latou aso soifua i le Aso Faraile nei, aso 14 Mati 2014, o le a faamanuiaina i le meaalofa ua saunia e le kamupani a le Vision Pictures Ltd. O le Afioga Leilua Vili Ieru, o se tamalii Samoa ua iloga lona tulai mai i pisinisi tau puepese ma ata tifaga Samoa i lenei foi vaitau.
O le Aso Faraile nei, i le Mangere Art Centre i le taulaga faatau i Magele o le a faaali ai mo le uluai taimi le ata tifaga Samoa, “Toe foi le tama Savaii – Part 2”. E na o le $10 le tau o le ticket e ulufale ai e maimoaina lenei ata matagofie, ae mo i latou uma e pa‘ū tonu o latou aso soifua i lea aso, 14 Mati 2014, ua manatu le pulega a le Vision Pictures Ltd o le a faimeaalofa i ai, e ala i le ulufale fua e leai se totogi, peitai e manaomia e le susuga Vili ma le pulega ona faailoa atu lou ID a o lei oo i le Aso Faraile.
Saunoa le susuga Vili, o le fuafuaga sa muai faataatia, e na o le faalua ona faaali le ata i lea aso, i le taeao i le 10:00am ma le 12:30pm i le aoauli, aemaise ina ia maua se aso mo nai tamā ma tina matutua aemaise le aunofo fale e eva mai ai ma matamata i lenei ata, aemaise o lea e faaali i le ao ma e uma nei faaaliga e lei tuua tamaiti aoga. Peitai ua vave ona logotala i ai le aufaigaluega, ma ua faigata ai foi ona teena lo latou manao e fia maimoa foi latou pe a mānava galuega o lea aso.
O lea la ua toe faaopoopo ai le isi faaaliga lona tolu i lea lava aso, i le afiafi i le 7:30pm e pei ona faamautinoa mai e le alii pule. O le fautuaga a le pulega i le mamalu o le atunuu o loo fuafua e fia auai, e lelei lava le vavevave atu pe ā ma se ‘afa itula a o lei amataina nei faaaliga uma, auā o le a amata sa‘o lava le ata i taimi ua faatulaga atu, 10:00am, 12:30pm ma le 7:30pm. Ua iai le faamoemoe o le a tatalaina foi lenei ata i Sini i Ausetalia i le aso 28 o le masina lava lenei o Mati.
