E 21 laau su‘isu‘i na fai meaalofa ai le malo o Ausetalia mo le Mafutaga a Tina o le afioaga o Moataa. E tusa ma le $17,000 tala Samoa le tau aofai o lenei foai.
O lenei galuega o se taumafaiga a le Mafutaga a Tina e pei ona latou galulue ai i soo se galuega faatina o loo faatulagaina atu e le ofisa o Tina ma Tamaitai. O le Tina o le galuega e ta‘ita‘i ai i lenei faatinoga, faapea foi ma le sailiga o tupe mo le faatinoga o nei galuega lelei. Na ia saunoa e faamaoti lava le galuega su‘isu‘i mo tina talavou o le Mafutaga ona ua tele tina ua matutua soifua.
Ua mae‘a foi ona latou faatino le galuega o le tuiina o teu fugalaau (flower arrangement) ma o se galuega na matagofie tele lona faatinoina i le fiafia o tina i lea foi matafaioi tāua. E aogā tele ia galuega mo le teuina o falesa ma maota e fai ai tauaofiaga i soo se faatasiga e pei o faaipoipoga, faaulufalega ma isi faatasiga tāua faapena.
O lenei foi la ua faasolo atu i le su‘isu‘i ma o se faamāmā avega foi lea i aiga pe a fai ni faaipoipoga ma ni aso fanau, auā o aso nei ua matuā taugata lava le totogi o falesu‘isu‘i.
E faamalo atu i le Peresetene o le Mafutaga a Tina ona ua lē na o le tapenaga o agaga i le faakerisiano, ae ua faapea foi mo tapenaga matagofie mo le silafia i galuega lelei mo aiga ma le lumanai mo le vasega o tina talavou o le ekalesia ma le afioaga.
