Talofa e, i si fafine o Suli, ua pei o se fafine valea, ma se fafine ua leai sona mafaufau i le taimi na tagi taavalevale ai ma tatu‘i lona ulu lea e pei o le a pa i le oono, ona ua matua le mafai e lona mafaufau faaletagata soifua ona faamalamalama pe aisea lava na faia ai e lona toalua lenei amioga leaga i lenei taimi atoa, sa latou faifai mea faatasi ai, ma fegalegaleai o se aiga, a o lenei e fai foi le isi mafutaga ma le isi fafine ma lanai a foi fanau lea ua maua ai.
Na uma le aueue o le fafine a o tau faaoleole e lana fanau, ona tapena uma loa lea o a latou mea. E leai ma se tamaititi na toe manao e nofo i lo latou tama.
Na o mai uma tama e toatolu ma o latou taitoalua e taumafai pe toe mafai ona sui le loto o le latou tina, ae ua matua fulitua lava le fafine i lona toalua. O le tamaloa o Fono, e leai ma se tala na gagana i ai. Ua na o le saofai ma sioa i lona toalua, lea ua tumutumu iai lana fanau e tau faaoleole.
Na faifai tetele le mataupu a le aiga, aua ua logotala tuafafine ma le tina o Fono i Niu Sila, ma ua feita uma mai teine i le latou tuagane, lenei ua toe faavalevalea ua matua. Talofa e, fai mai foi poo le a se tuinanau ina a tetele i fea, ae o mata lava o tamaiti e ufiufi ai.
Poo le a foi se tiga i fea, o mata lava o tamaiti e toe foi mai ai. Ae ua leai lava, ua malepe lava le aiga o Fono ma Suli, le aiga sa avea ma taulaiga o tagata uma.
